विश्वको दशौं दुर्लभ रक्त भएको व्यक्ति गुजरातमा फेला परे..

काठमाडौं । भारतको पश्चिमी राज्य गुजरातको ६५ वर्षीय व्यक्तिमा दुर्लभ रगत समूह ईएमएम नेगेटिभ पत्ता लगाइएको छ ।

उक्त समूहलाई अन्य रक्त समूह ए, बी, ओ वा एबीमा वर्गीकृत गर्न सकिँदैन । उनी हृदय रोगबाट पीडित छन् । मानव शरीरमा ए, बी, ओ, आरएच, र डफी सहित ४२ विभिन्न प्रकारका रक्त प्रणालीहरू छन् । सुरतको समपूर्ण रक्तदान केन्द्रका चिकित्सक सम्मुख जोशीका अनुसार हृदयघातपछि अहमदाबादमा उपचार गरिरहेका ती वृद्धलाई मुटुको शल्यक्रियाका लागि रगत आवश्यक थियो ।

तर अहमदाबादको प्रथमा प्रयोगशालामा उनको रगतको समूह पहिचान गर्न नसकेपछि सुरत रक्तदान केन्द्रमा नमुनाहरू पठाइएको थियो । पछि ती वृद्धको रक्त समूह भारतमा पहिलो र विश्वको दशौं घटना भएको पत्ता लाग्यो । इन्टरनेशनल सोसाइटी अफ ब्लड ट्रान्सफ्युजन (आइएसबीटी)ले यसलाई ईएमएमः नेगेटिभ भनेर तोकेको छ ।

ईएमएम विभिन्न प्रकारका ३७५ एन्टिजनहरूमा पनि उच्च मात्रामा उपस्थित हुन्छ । विश्वमा हालसम्म ९ जनामा मात्रै दुर्लभ रगतको समूह छ । यी अत्यन्त दुर्लभ रगत समूह भएका मानिसहरूले अरूबाट रगत दान र प्राप्त गर्न सक्दैनन् ।