४३३१ विद्यार्थीलाई सीटीईभीटीको निःशुल्क छात्रवृत्ति

काठमाडौं । प्राविधिक शिक्षा तथा व्यवसायिक तालिम परिषद (सीटीईभीटी)ले प्रमाणपत्र तह तथा डिप्लोमा विभिन्न २९ ओटा शैक्षिक कार्यक्रमका लागि २९१३ जना र प्रि डिप्लोमा तहमा १८१४ गरी ४३३१ जना विद्यार्थीलाई निःशुल्क छात्रवृत्ति दिने जनाएको छ ।

बिहीबार एक सूचना प्रकाशित गर्दै सीटीईभीटी अन्तर्गतको परीक्षा नियन्त्रण कार्यालय सानोठिमी, भक्तपुरले निस्शुल्क छात्रवृत्तिका लागि अनलाइन आवेदन खुलाएको हो । शैक्षिक सत्र २०७९र०८० मा डिप्लोमा तथा प्रमाणपत्र तहको प्रवेश परीक्षा सञ्चालन, छात्रवृत्ति वितरण एवम् भर्ना सम्बन्धी निर्देशिका २०७० अनुसार परिषद्‌बाट सम्बन्धन प्राप्त आङ्गिक, साझेदारी, टेक्स तथा निजी शिक्षालयहरूमा अध्ययन गर्न यस्तो छात्रवृत्ति उपलब्ध गराउन लागिएको छ ।

यसका लागि २०७९ साउन २९ गते राति १२ बजे भित्र अनलाइनबाटै प्रवेश शुल्क भुक्तानी गरी आवेदन समेत अनलाइनमै दिनुपर्ने सीटीईभीटीले जनाएको छ । प्रमाणपत्र तहमा सामान्य चिकित्सा, मेडिकल ल्याब टेक्नोलोजी, डेन्टल साइन्स, रेडियोग्राफी, सामान्य आयुर्वेदिक चिकित्सा, अप्थाल्मिक विज्ञान, अकुपञ्चर, फार्मेसी, फिजियोथेरापी र डिप्लोमा तहमा योग एन्ड नेचुरोपेथीका लागि वर्गीकृत निस्शुल्क छात्रवृत्ति कोटा छुट्याइएको छ । यसका साथै डिप्लोमा तहमा सिभिल इन्जिनियरिङ, इलेक्ट्रिकल इन्जिनियरिङ, इलेक्ट्रोनिक्स इन्जिनियरिङ, इलेक्ट्रिकल एन्ड इलेक्ट्रोनिक्स इन्जिनियरिङ, जिओमेटिक्स इन्जिनियरिङ र आर्किटेक्चर इन्जिनियरिङका लागि समेत निस्शुल्क छात्रवृत्ति पाउन सकिनेछ ।

त्यस्तै सोही तहमा मेकानिकल इन्जिनियरिङ, मेकाट्रोनिक्स इन्जिनियरिङ, अटोमोबाइल इन्जिनियरिङ, आईटी, कम्प्युटर इन्जिनियरिङ, रेफ एन्ड एसी इन्जिनियरिङ, सिभिल इन्जिनियरिङ (हाइड्रोपावर स्पेसलाइजेसन), एग्रिकल्चर (बाली विज्ञान), एग्रिकल्चर (पशु विज्ञान), फुड एन्ड डेरी टेक्नोलोजी, फरेस्ट्री, होटेल म्यानेजमेन्ट र सोसल वर्करमा समेत छात्रवृत्तिका लागि आवेदन दिन सकिनेछ ।

त्यस बाहेक प्रि-डिप्लोमा तहका लागि एग्रिकल्चर (प्लान्ट साइन्स), लाइभस्टक प्रोडक्सन एन्ड एनिमल हेल्थ, भेटेरिनरी साइन्स, सिभिल इन्जिनियरिङ, इलेक्ट्रिकल इन्जिनियरिङ, इलेक्ट्रोनिक्स इन्जिनियरिङ, वाटर सप्लाइ एन्ड सेनिटरी इन्जिनियरिङका लागि समेत छात्रवृत्तिको आवेदन खुलाइएको छ । त्यस्तै, प्रि-डिप्लोमा तहमै सर्भे इन्जिनियरिङ, कम्प्युटर इन्जिनियरिङ, मेकानिकल इन्जिनियरिङ, अटोमोबाइल इन्जिनियरिङ, रेफ्रिजिरेसन एन्ड एयर कन्डिसनिङ इन्जिनियरिङ, होटेल म्यानेजमेन्ट, कुलिनरी आर्ट, इन्टरप्रेनरशिप डेभलपमेन्ट, सोसल मोबिलाइजेसन र कम्प्युटर एप्लिकेसन एन्ड सेक्रेटरियल म्यानेजमेन्ट कार्यक्रममा पनि निस्शुल्क छात्रवृत्ति कोटा छुट्याइएको छ ।

साउन १५ देखि खुला हुने अनलाइन आवेदन फारामका लागि डिप्लोमा तथा प्रमाणपत्र तहको एक हजार रुपैयाँ र प्रि-डिप्लोमा तहको पाँच सय रुपैयाँ प्रवेश परीक्षा शुल्क तोकिएको छ । जुन कनेक्ट आईपीएसको डाइरेक्ट अनलाइनबाट भुक्तानी गर्नुपर्नेछ । आवेदनमा रोजिएको जिल्ला भित्र परीक्षा केन्द्र रहने परिषद्‌ले जनाएको छ ।

ककसले भर्न पाउँछन् आवेदन?

एसएलसी तहको परीक्षामा ६८/३३ प्रतिशत तथा एसईईमा गणित, अङ्ग्रेजी र विज्ञान विषयमा न्यूनतम सी ग्रेड तथा अन्य विषयमा न्यूनतम डी ग्रेड प्राप्त गरी २ जीपीए ल्याएका विद्यार्थीले सीटीईभीटीको छात्रवृत्तिका लागि आवेदन दिन पाउने जनाइएको छ । प्रिडिप्लोमा तहका लागि एसएलसी वा सो सरहको परीक्षा तथा एसईईमा न्यूनतम ई ग्रेड प्राप्त विद्यार्थीहरूले छात्रवृत्तिका लागि आवेदन दिन पाउनेछन् ।