बालुवाटारमा आफूलाई अपमानित गरिएको भन्दै रवि प्रचण्डसँग फायर, आजै कडा जवाफ फर्काउने तयारी

काठमाडौं । राष्ट्रिय स्वतन्त्र पार्टीका सभापति रवि लामिछानेले आफूलाई प्रधानमन्त्री पुष्पकमल दाहालले बेवास्ता गरेको भन्दै असन्तुष्टि पोखेका छन् । सरकारमा रहने वा नरहने भन्नेबारे निर्णायक कदम चाल्नुअघि उनी पार्टीका केन्द्रीय सदस्यहरु र सांसदहरुसँगको छलफलमा जुटेका छन् । अहिले सो दलको बैठक जारी छ ।

आजको बैठकले पार्टी सरकारमा रहने वा नरहने भन्नेबारे निर्णय गर्ने चर्चा छ । बैठक बस्नुअघि सभापति लामिछानेले प्रधानमन्त्री दाहालसँग भेटेका थिए । सो भेटवार्तामा दाहालले लामिछानेलाई गृहमन्त्रालय मात्रै नभएर अब कुनैपनि मन्त्रालय दिन नसकिने आफ्नो अडान सुनाएका थिए । दाहालले आफूलाई अपमान गरेको भन्दै आक्रोशित बनेका छन् ।

बैठक बस्नुअघि उनले आज आफूले विशेष पत्रकार सम्मेलन गर्ने र सो अवसरमा केही सिधा कुरा गर्ने बताएका छन् । लामिछानेको नागरिकतासम्बन्धी सर्वोच्चको फैसला आएपछि गृहमन्त्रालय प्रधानमन्त्री दाहाल आँफैले राखेका छन् । लामिछानेले अदालतको फैसलाबमोजिम नागरिकता पूनः प्राप्ति गरिसकेका छन् । सोसँगै उनले गृहमन्त्रालयको नेतृत्वमा फर्कनेगरि दबाब बढाएका थिए । तर, दाहालले भने कुनैपनि हालतमा गृहमन्त्रालय नदिने अडान लिएका छन् ।