काठमाडौं । प्रधानमन्त्री पुष्पकमल दाहाल ‘प्रचण्ड’ ले आज प्रतिनिधिसभामा दोस्रो पटक विश्वासको मत लिँदैछन् । प्रचण्ड गत पुस १० मा नेकपा एमाले, राप्रपा लगायत दलको समर्थनमा प्रधानमन्त्री नियुक्त भएका थिए । प्रचण्ड गठबन्धन बदलेर कांग्रेस, एकीकृत समाजवादीतिर फर्किएपछि ती दलले आफ्नो समर्थन फिर्ता लिएका थिए ।
संविधानको धारा १०० (२) को व्यवस्था अनुसार, प्रचण्डले विश्वासको मत लिन लागेको हुन् । संविधानको धारा १०० (२)मा ७६ -२ं बमोजिम गठन भएको सरकारले कुनै दलले समर्थन फिर्ता लिएको खण्डमा ३० दिनभित्र विश्वासको मत लिनुपर्ने व्यवस्था छ ।
प्रचण्ड सुविधाजनक बहुमतमा रहेपनि उनको आफ्नै दल र गठबन्धनका सांसदको मत पाउने छैनन् । त्यसमा माओवादी केन्द्रका सांसद वर्षमान पुन, कांग्रेसका सांसद चन्द्र भण्डारी र मनोरमा शेरचन छन् । स्वास्थ्यमा समस्या आएपछि यी तीनै जना उपचाररत छन् ।
