काठमाडौँ । केन्द्रीय तथ्याङ्क विभागले सार्वजनिक गरेको राष्ट्रिय जनगणनाको नतिजा अनुसार अझै ५१ प्रतिशत परिवारले दाउरामा खाना पकाउने गरेका छन् । शुक्रबार सार्वजनिक तथ्याङ्क अनुसार देशका कुल परिवार मध्ये आधा भन्दा बढी अर्थात ५१ प्रतिशत परिवारले खाना पकाउन काठ र दाउरा प्रयोग गर्ने गरेका छन ।

खाना पकाउन अक्सर एलपि ग्यास प्रयोग गर्नेको संख्या ४४ दशमलव ३ प्रतिशत रहेको छ भने बिजुलीबाट खाना पकाउने परिवार संख्या ० दशमलव ५ प्रतिशत रहेको छ । गुईठा र गोरहाबाट खाना पकाउने परिवार २ दशमलव ९ प्रशित रहेको छ । बायोग्याँस प्रयोग गरेर खाना बनाउने परिवार संख्या १ दशमलव २ प्रतिशत रहेको छ ।

मट्टितेलबाट शून्य दशमलव ०५ प्रतिशत र अन्य इन्धन प्रयोग गरी खाना बनाउने परिवार संख्या ० दशमलव १ प्रतिशत रहेको छ । राष्ट्रिय जनगणना २०६८ अनुसार ६४ प्रतिशतले परिवारले खाना पकाउन दाउरा प्रयोग गर्ने गरेकोमा १० वर्षमा दाउराबाट खाना बनाउने परिवार १३ प्रतिशतले घटेको पाइएको छ ।
यस्तै बत्ती बाल्न ९२ दशमलव २ प्रतिशत परिवारले बिजुली प्रयोग गर्ने गरेका छन् । गत जनगणनामा बिजुली प्रयोग गर्ने परिवार ६७ दमलव ३ प्रतिशत रहेकोमा बिजुलीबाट बत्ति बाल्नेको संख्यामा वृद्धि भएको हो ।

बत्ती बाल्नका लागि अक्सर सोलार र सौर्य ऊर्जा प्रयोग गर्नेको संख्या ६ दशमलव ६ प्रतिशत रहेको छ भने मट्टितेल प्रयोग गर्नेको संख्या शून्य दशमलव ६ प्रतिशत रहेको छ ।