राजीनामा दिँदै थापाले भने: आफूले पाएको अवसर जोगाउन नसक्नु मेरोपनि कमजोरी हो

काठमाडौं । कोशी प्रदेशको मुख्यमन्त्रीमा केदार कार्की नियुक्त भएपछि नेपाली कांग्रेस कोशी प्रदेश संसदीय दलका नेता उद्धव थापाले पदबाट राजीनामा दिएका छन् ।

उनले आज विराटनगरमा पत्रकार सम्मेलनको आयोजना गर्दै राजीनामा दिएको घोषणा गरेका हुन् । प्रदेश सभाको निर्वाचन पछि भएको संसदीय दलको चुनावमा आफैसँग चुनाव हारेका कार्की मुख्यमन्त्री बनेपछि उनले नैतिकताको आधारमा राजीनामा दिएको बताएका छन् ।

कार्की आफ्नो पार्टीका ८ र नेकपा एमालेका ३९ सांसद्को समर्थनमा आज मुख्यमन्त्री नियुक्त भएका थिए । संसदीय दलको नेताबाट राजीनामा दिएका थापाले पछिल्लो ४८ घण्टामा घटेका राजनीतिक घटनाक्रममा आफूपनि जिम्मेवार रहेको बताएका छन् । उनले केन्द्र र पार्टीले दिएको निर्देशन र जिम्मेवारपिूरा गर्न नसकेपछि पदबाट राजीनामा दिएको बताए ।

‘मैले पाएको अवसरलाई गुमाएँ, अदालतले मलाई मुख्यमन्त्रीबाट हटायो । त्यतिबेलै मैले राजीनामा दिनुपर्थ्यो,’ उनले भने, ‘पछिल्लो समय कोशी प्रदेश सरकार निर्माण प्रक्रियामा भएका विकसित घट्‌नाक्रमले गर्दा नैतिक रूपमा मैले संसदीय दलको नेताको रुपमा बसिरहन उपयुक्त नभएको महसुस गरे । आजको मितिदेखि लागू हुने गरी मैले नेपाली कांग्रेस कोशी प्रदेश संसदीय दलको नेताको पदबाट राजीनामा दिइएको जानकारी गराउँदै दलको नीति, सिदान्त र आदर्श प्रति प्रतिवद्ध रहँदै आगामी दिनमा क्रियाशील रहिरहने छु ।’

थापा यसअघि गत असार २१ र साउन ज्ञठ मा गरि दुईपटक मुख्यमन्त्री बनेका थिए । तर पहिलो पटक सभामुख बाबुराम गौतमको हस्ताक्षर प्रयोग गरेको र दोस्रो पटक प्रदेश सभाको अध्यक्षता गरिरहेका सभामुखको मत पाएको भन्दै सर्वोच्च अदालतले पदच्यूत गरेको थियो ।