काठमाडौं । कोशी प्रदेशमा एमालेको सहयोगमा कांग्रेसका विद्रोही सांसद केदार कार्की मुख्यमन्त्री बनेसँगै केन्द्रीय राजनीतिमा नै हलचल पैदा भएको छ । एमालेका शीर्ष नेताहरुले नै नै प्रधानमन्त्री पुष्पकमल दाहाल नेतृत्वको वर्तमान सरकारको आयु तोक्न थालिसकेका छन् । खासगरी एमाले उपाध्यक्ष सुरेन्द्र पाण्डेले प्रचण्डको प्रधानमन्त्री पद अब बढिमा दुई महिनामात्रै रहने सनसनीपूर्ण टिप्पणी गरे ।
उनले यति भन्दा आफूले हचुवाको भरमा वा कतै सुनेको भरमा नभएर गम्भीर सूचनाको आधारमा भनेको पनि दाबी गरे । कोशी प्रदेशको प्रभाव केन्द्रसम्म पर्नेमा एमाले नेताहरुको सार्वजनिक अभिव्यक्ति आउन थालेको छ । एमाले पोलिटब्यूरो सदस्य महेश बस्नेतले कांग्रेसले बुद्धि पुर्याए एमाले–कांग्रेसको सहकार्य गर्न ढिलाई गर्न नहुने धारणा राख्दै आएका छन् । अध्यक्ष केपी शर्मा ओलीले पनि पछिल्लो समय प्रचण्ड नेतृत्वको सरकार जतिसक्दो चाँडै ढाल्नुपर्ने आवश्यकत्ता औंल्याएका छन्।
उनले प्रचण्ड सरकार रहेसम्म मुलुक र जनताले दुःख पाउने टिप्पणी गरेका छन् । सरकारविरुद्ध निरन्तर धावा बोल्ने काम कांग्रेसका नेता शेखर कोइरालाले पनि गरिरहेका छन् । उनै शेखरले पार्टीभित्र विद्रोह गराएर आफूनिकट केदार कार्कीलाई एमालेको समर्थनमा कोशीको मुख्यमन्त्री बनाए ।
शेखरलाई एमाले नेतृत्वले केन्द्रीय सरकारको नेतृत्व गर्ने अवसर खेल नफाल्न भनेको कांग्रेस नेताहरुकै दाबी छ । पार्टी सभापति शेरबहादुर देउवाले शेखरको पछिल्लो कदम र एमालेसँगको साँठगाँठलाई लिएर महामन्त्रीयद्धय विश्वप्रकाश शर्मा र गगन थापासँग हिजो गम्भीर छलफल गरेका थिए । शेखरलाई महामन्त्रीद्धयले यसपटक साथ दिएका छैनन् ।
तर, कोशीमा विकसित राजनीतिक घट्ना र उत्पन्न परिस्थितिको भने सभापतिले नै जिम्मा लिनुपर्ने उनीहरुको भनाई थियो । कोशी प्रदेशमा विकास भएको राजनीतिलाई लिएर एमाले नेतृत्व पँक्ति उत्साही रहेको बताईएको छ । कतिपयले दशै, तिहार, छठलगायतका ठूला चाडपर्व सकिएलगत्तै सरकार परिवर्तन हुने पनि भविष्यवाणी गर्न थालेका छन् ।
तर, प्रधानमन्त्री दाहाल भने अहिलेको गठबन्धन संसद्को पूरा कार्यकाल नै रहने दाबी गर्छन् । उनले कोशीमा एमालेले खेल्न खोजेको भएपनि आफूहरुले त्यसलाई रोकेको दाबी सुनाएका छन् । प्रचण्डले गठबन्धन टुटाउने खेले एमाले आँफै फस्दै जाने पनि दाबी गरेका छन् ।
