प्रादेशिक अस्पताल पोखरियामा औषधि अभाव, बिरामी प्रभावित

वीरगंज । प्रादेशिक अस्पताल पोखरियामा औषधि अभावले सेवाग्राहीहरूलाई समस्या भएको छ । चालू आर्थिक वर्षको सुरु हुनुअघि नै औषधिको अभाव देखिएको यस अस्पतालमा अहिलेसम्म पर्याप्त व्यवस्थापन हुन सकेको छैन ।

सेवाग्राहीहरूका अनुसार २०७८/७९ वैशाखदेखि नै आवश्यक औषधि उपलब्ध नहुँदा उपचारमा कठिनाइ भइरहेको छ । सरकारले बिरामीका लागि ९७ प्रकारका औषधि निस्शुल्क उपलब्ध गराउने घोषणा गरेको भएपनि हाल अस्पतालमा चार पाँच प्रकार बाहेक अन्य औषधि पाउन कठिन भएको छ ।

पूर्वमा जिल्ला अस्पतालको रूपमा सञ्चालन हुँदा पोखरिया नगरपालिकाले औषधि आपूर्ति गर्दै आएको थियो । तर प्रादेशिक अस्पताल घोषणा भएपछि प्रदेश सरकारले औषधि खरीदका लागि बजेट पठाउन ढिला गरेकाले स्थिति झनै नाजुक बनेको मेडिकल सुपरिटेन्डेन्ट डा. आनन्दकुमार रौनियारले बताए ।

उनका अनुसार विगत ८ महिनादेखि औषधि अभावको अवस्था जारी छ । औषधि अभाव मात्र होइन, अस्पतालको ल्याबमा आवश्यक केमिकल नभएको र एक्सरे सेवा पनि सञ्चालनमा नहुने अवस्था छ । १५ शैयाबाट ५० शैयामा स्तरोन्नति भएपनि औषधि र सेवा अभावका कारण बिरामी भर्ना हुन सकेका छैनन् ।

सेवाग्राहीहरूले बताए अनुसार, पालिकामा अस्पतालले औषधि व्यवस्थापन गर्न सक्थ्यो, तर प्रादेशिक घोषणा भएपछि सेवा विस्तार हुनुपर्नेमा कटौती भएको छ । चाडपर्वको अवसरमा स्वास्थ्य बीमाबाट आएको ४० लाख रुपैयाँ कर्मचारीहरूको तलब र सेवा सुविधामा खर्च हुँदा वास्तविक बिरामी प्रभावित भएका हुन् ।

अस्पताल विकास समितिका अध्यक्ष उमेश चौहानका अनुसार, प्रदेशमा राजनीतिक खिचातानीका कारण कर्मचारीहरू प्रभावित भएकाले स्वास्थ्य क्षेत्रमा असर परेको छ । आन्तरिक स्रोतबाट औषधि खरीदको तयारी हुँदा लेखापाल अख्तियारको कारबाहीमा परेर निलम्बनमा परेकाले समस्या झनै बढेको उनले बताए ।