प्रतिनिधिसभा निर्वाचनका लागि करिब २ लाख १३ हजार कर्मचारी परिचालन गरिने

काठमाडौं । फागुन २१ गते हुने प्रतिनिधिसभा सदस्य निर्वाचनलाई व्यवस्थित रूपमा सम्पन्न गर्न निर्वाचन आयोगले देशभर करिब २ लाख १३ हजार कर्मचारी परिचालन गर्ने तयारी गरेको छ । आयोगका अनुसार देशभरका १६५ निर्वाचन क्षेत्रअन्तर्गत रहेका २३ हजार ११२ मतदान केन्द्रमा निर्वाचन सञ्चालन गर्न आवश्यक जनशक्ति व्यवस्थापनको काम अघि बढाइसकिएको छ ।

यसका लागि केन्द्रीय कार्यालयसहित ७७ मुख्य निर्वाचन अधिकृत कार्यालय, ८८ निर्वाचन अधिकृत कार्यालय, ७० जिल्ला निर्वाचन कार्यालय तथा ७ प्रदेश निर्वाचन कार्यालयमार्फत कर्मचारी परिचालन गरिनेछ ।

मुख्य निर्वाचन अधिकृतको कार्यालयको नेतृत्व जिल्ला न्यायाधीशले गर्ने व्यवस्था छ । त्यस्तै, निर्वाचन अधिकृत कार्यालयमा न्याय सेवाका उपसचिवसरह, जिल्ला निर्वाचन कार्यालयमा शाखा अधिकृतसरह तथा प्रदेश निर्वाचन कार्यालयमा उपसचिवसरहका कर्मचारीले नेतृत्व गर्नेछन् ।

मतदाता संख्याका आधारमा मतदान केन्द्रमा खटाइने कर्मचारी संख्या तोकिएको आयोगले जनाएको छ । ५०० सम्म मतदाता रहेका मतदान केन्द्रमा ८ जना र ५०० भन्दा बढी मतदाता भएका केन्द्रमा ९ जना कर्मचारी रहने व्यवस्था गरिएको छ । अस्थायी मतदान केन्द्रमा भने ५ जना कर्मचारी खटाइनेछन् ।

नियमित दरबन्दीबाट कर्मचारी अपुग भएमा संघ, प्रदेश र स्थानीय तहका कर्मचारी प्रयोग गरिने आयोगले जनाएको छ । आवश्यक परे शिक्षकसमेत निर्वाचन कार्यमा खटाइनेछन् । मतदान केन्द्रमा खटिने कर्मचारीहरू फागुन महिनामा निर्वाचन नजिकिँदै जाँदा परिचालन गरिनेछन् ।

निर्वाचनमा खटिने कर्मचारीका लागि भत्ता, अतिरिक्त कामको सुविधा तथा बीमाको व्यवस्था गरिएको छ । मतदान अधिकृतलाई दैनिक २ हजार ५०० रुपैयाँ, सहायक मतदान अधिकृतलाई २ हजार रुपैयाँ, सहायक कर्मचारीलाई १ हजार ६०० रुपैयाँ तथा सहयोगी कर्मचारी र स्वयंसेवकलाई जनही १ हजार २०० रुपैयाँ भत्ता उपलब्ध गराइनेछ । साथै, निर्वाचनमा खटिने सबै कर्मचारीलाई जनही २० लाख रुपैयाँ बराबरको बीमा सुविधा प्रदान गरिने आयोगले जनाएको छ ।

निर्वाचन व्यवस्थापनका चालू खर्चअन्तर्गत विभिन्न ४८ शीर्षकमा कुल ६ अर्ब ६८ करोड रुपैयाँ बजेट विनियोजन गरिएको आयोगले जानकारी दिएको छ । यी सबै व्यवस्था प्रतिनिधिसभा सदस्य निर्वाचन सञ्चालन ९आर्थिक व्यवस्थापन० कार्यविधि, २०८२ अनुसार गरिएको हो ।