राष्ट्रपति रामचन्द्र पौडेलले गरे थप तीन वटा अध्यादेश जारी

काठमाडौं । राष्ट्रपति रामचन्द्र पौडेलले शनिबार थप तीन वटा अध्यादेश जारी गरेका छन् । मन्त्रिपरिषद्को सिफारिसमा नेपालको संविधान धारा ११४ (१) अनुसार ती अध्यादेशहरु जारी गरिएको बताइएको छ ।

राष्ट्रपतिको कार्यालयका प्रवक्ता रितेशकुमार शाक्यका अनुसार जारी गरिएका अध्यादेशहरुमा ‘स्वास्थ्य विज्ञान प्रतिष्ठान सम्बन्धी केही नेपाल ऐनलाई संशोधन गर्ने अध्यादेश २०८३’, ‘सार्वजनिक पदाधिकारीको पदमुक्ति सम्बन्धि विशेष व्यवस्था अध्यादेश २०८३’ र ‘विश्वविद्यालय सम्बन्धि केही नेपाल ऐनलाई संशोधन गर्ने अध्यादेश २०८३’ समावेश छन् ।

यसअघि शुक्रबार राष्ट्रपति पौडेलले सम्पत्ति शुद्धीकरण (मनी लाउन्डरिङ्ग) निवारण तेस्रो संशोधन अध्यादेश २०८३ जारी गरेका थिए । त्यस्तै, यसअघि नै सार्वजनिक खरिद (दोस्रो संशोधन) अध्यादेश २०८३ र सहकारीसम्बन्धि अध्यादेश पनि जारी भइसकेका छन् ।

संसद् अधिवेशन स्थगित रहेको अवस्थामा सरकारले तत्काल आवश्यक ठानेका कानुनी व्यवस्थाहरु लागु गर्न अध्यादेशमार्फत अघि बढेको जनाइएको छ ।