नेपालबाट भिडाको अन्तर्राष्ट्रिय यात्रा सुरु, विद्युतीय स्कुटर र अफ–रोड बाइक सार्वजनिक

काठमाडौं । हिरो मोटोकर्प अन्तर्गतको विद्युतीय दुईपांग्रे ब्रान्ड भिडाले आफ्नो पहिलो अन्तर्राष्ट्रिय बजारका रूपमा नेपालमा औपचारिक प्रवेश गरेको छ। कम्पनीले विश्वव्यापी विस्तारको सुरुआत नेपालबाट गरेको घोषणा गर्दै नेपाली बजारमा विद्युतीय स्कुटर र अफ–रोड मोटरसाइकल उपलब्ध गराएको हो।

नेपालमा भिडाका उत्पादनहरूको आधिकारिक बिक्री तथा बिक्रीपछिको सेवा सीजी मोटर्स (चौधरी समूह) मार्फत उपलब्ध हुनेछ। चौधरी समूहले भिडाको आगमनले नेपालको विद्युतीय दुईपांग्रे सवारी बजारमा नयाँ विकल्प थपिने र हरित यातायातको विस्तारमा योगदान पुग्ने विश्वास व्यक्त गरेको छ।

हिरो मोटोकर्पको उदीयमान विद्युतीय गतिशीलता व्यवसाय एकाइकी प्रमुख व्यवसाय अधिकृत कौशल्या नन्दकुमार ले नेपालबाट भिडा को अन्तर्राष्ट्रिय यात्रा सुरु हुनु कम्पनीका लागि गर्वको विषय भएको बताइन्। उनका अनुसार नेपाल विद्युतीय सवारीको तीव्र रूपमा विस्तार भइरहेको रणनीतिक बजार भएकाले आधुनिक प्रविधिमा आधारित विद्युतीय दुईपांग्रे नेपाली उपभोक्तासम्म ल्याउन कम्पनी उत्साहित छ।

त्यसैगरी चौधरी समूहका प्रबन्ध निर्देशक निर्वाण चौधरीले नेपाल दिगो तथा हरित यातायाततर्फ तीव्र गतिमा अघि बढिरहेको उल्लेख गर्दै भिडा को आगमनले विद्युतीय दुईपांग्रे बजारमा नयाँ मानक स्थापित गर्ने विश्वास व्यक्त गरे। उनले हिरो मोटोकर्पसँगको सहकार्यलाई भिडा मार्फत अझ सुदृढ बनाउँदै नेपालको हरित भविष्य निर्माणमा योगदान दिने बताए।

दैनिक आवतजावतका लागि डिजाइन गरिएको विद्युतीय स्कुटरमा दुई भेरियन्ट उपलब्ध छन्। पहिलो भेरियन्टमा ४.४ किलोवाट–घण्टा क्षमताका दुईवटा निकाल्न मिल्ने ब्याट्री रहेका छन्, जसले करिब १४० किलोमिटरसम्मको दूरी, ९० किलोमिटर प्रतिघण्टासम्मको अधिकतम गति तथा ० देखि ४० किलोमिटर प्रतिघण्टा गति ३.१ सेकेन्डमा हासिल गर्न सक्छ। यसलाई डीसी द्रुत चार्जिङमार्फत ६५ मिनेटमा ८० प्रतिशतसम्म चार्ज गर्न सकिन्छ।

दोस्रो भेरियन्टमा २.२ किलोवाट घण्टा क्षमताको निकाल्न मिल्ने ब्याट्री रहेको छ, जसले करिब ७५ किलोमिटरसम्मको दूरी, ७० किलोमिटर प्रतिघण्टासम्मको अधिकतम गति तथा ० देखि ४० किलोमिटर प्रतिघण्टा गति ४.२ सेकेन्डमा लिन सक्छ। यसमा पनि द्रुत चार्जिङ सुविधा उपलब्ध छ।

दुवै मोडलमा घरमै सामान्य ५ एम्पियर सकेटबाट चार्ज गर्न सकिने सुविधा, मोबाइल अनुप्रयोग, मार्गनिर्देशन, भौगोलिक सुरक्षा घेरा, कल तथा सन्देश सूचना र स्वचालित सफ्टवेयर अद्यावधिक जस्ता स्मार्ट कनेक्टेड सुविधा समावेश छन् कम्पनीले युवापुस्तालाई लक्षित गर्दै विद्युतीय अफ–रोड मोटरसाइकल पनि सार्वजनिक गरेको छ। यसमा प्रयोगकर्ताको उमेर र शारीरिक बनावटअनुसार समायोजन गर्न सकिने प्रणाली रहेको छ।

मोबाइल अनुप्रयोगमार्फत अभिभावकीय नियन्त्रण सुविधा उपलब्ध भएकाले अभिभावकले अधिकतम गति निर्धारण गर्न तथा तीनवटा गति मोड (८–९, १७–१८ र २३–२४ किलोमिटर प्रतिघण्टा) चयन गर्न सक्नेछन्।

३५० वाट मोटर र निकाल्न मिल्ने ब्याट्रीले सुसज्जित यो बाइकले प्रयोगको अवस्था अनुसार करिब तीन घण्टासम्म राइडिङ अनुभव प्रदान गर्ने कम्पनीको दाबी छ। ब्याट्री २० देखि ८० प्रतिशतसम्म चार्ज हुन करिब दुई घण्टा लाग्ने बताइएको छ। यो अफ–रोड बाइकले उत्कृष्ट डिजाइन र नवीन प्रविधिका लागि रेड डट डिजाइन पुरस्कार २०२५ र सीईएस नवप्रवर्तन पुरस्कार २०२६ समेत प्राप्त गरिसकेको छ।

सन् २०१४ देखि नेपाली बजारमा उपस्थित हिरो मोटोकर्पले भिडा ब्रान्डमार्फत नेपालमा स्मार्ट, दिगो तथा भविष्यमुखी विद्युतीय गतिशीलताको नयाँ अध्याय सुरु गरेको जनाएको छ। कम्पनीका अनुसार प्राविधिक विवरणहरू आन्तरिक परीक्षणका आधारमा मापन गरिएको हो र वास्तविक प्रयोग तथा सडक अवस्थाअनुसार फरक पर्न सक्नेछ।