बिजुलीको महशुल घटाउने तयारीमा उर्जा मन्त्रालय

काठमाडौँ । सरकारले वर्षायामममा बढी उत्पादन भएर खेर जाने विद्युतको खपत बढाउन बिजुलीको महशुल घटाउने तयारी गरेको छ । ऊर्जा,जलस्रोत तथा सिँचाइमन्त्री विराजभक्त श्रेष्ठको प्रस्तावमा विद्युत महसुल पुनरावलोकनका लागि समिति गठन गरिएको हो ।

नेपाल विद्युत प्राधिकरणका सञ्चालक समिति सदस्य अंशुकिरण शाहीको संयोकत्वमा रहेको समितिले आज मन्त्रालयमा बैठक गर्दैछ । बैठकमा उपभोक्ता र उद्योगलाई साहुलियत दरमा बिजुली उपलब्ध गराउने उपायबारे छलफल हुने गरेको जनाइएको छ ।

समितिले वर्षायाममा लागू हुने सिजनल ट्यारिफ मार्फत विद्युत महसुल घटाउने प्रस्ताव अघि बढाएको छ । वर्षायाममा उत्पादन बढी हुँदा विद्युत खेर जाने र प्राधिकरणले नोक्सानी व्यहोर्नुपर्ने भएकाले सस्तो महसुलमार्फत आन्तरिक खपत बढाउने तयारी गरिएको हो ।

उद्योगलाई सस्तो बिजुली उपलब्ध गराउँदा उत्पादन लागत घट्ने र त्यसको लाभ उपभोक्तासम्म पुर्याउने विषयमा समेत छलफल भइरहेको छ । समितिले आवश्यक अध्ययनपछि छिट्टै महशुलसम्बन्धी निर्णय गर्ने जनाइएको छ ।