नेपाल इको प्यानलद्धारा कर्मचारी तथा परिवारका सदस्यको वार्षिक स्वास्थ्य र आँखा परीक्षण

भक्तपुर । भक्तपुरको झौलखेलस्थित नेपाल इको प्यानल प्रा.लि.को कारखाना परिसरमा “स्वस्थ कर्मचारी, स्वस्थ उद्योग” भन्ने उद्देश्यका साथ वार्षिक स्वास्थ्य तथा आँखा परीक्षण कार्यक्रम सम्पन्न भएको बताइएको छ । उद्योगमा कार्यरत सम्पूर्ण कर्मचारी तथा उनीहरूका परिवारका सदस्यलाई लक्षित गरी आयोजित कार्यक्रममा सामान्य स्वास्थ्य परीक्षण तथा आँखा परीक्षण गरिएको जनाइएको छ । 

इको प्यानलका अनुसार कार्यक्रममा चिकित्सक तथा स्वास्थ्यकर्मीहरूको टोलीले सहभागीहरूको स्वास्थ्य अवस्था परीक्षण गर्दै आवश्यक स्वास्थ्यसम्बन्धी परामर्शसमेत प्रदान गरेको थियो । नेपाल इको प्यानलले कर्मचारीको स्वास्थ्य, सुरक्षा तथा कार्यस्थलमा सुरक्षित वातावरणलाई उच्च प्राथमिकता दिँदै आएको जनाइएको छ ।

उद्योगले आइएसओका मापदण्डहरू अवलम्बन गर्दै आएको दाबी गरेको छ । विशेषगरी आइएसओ ४५००१ः२०१८ अन्तर्गतको व्यावसायिक स्वास्थ्य तथा सुरक्षा व्यवस्थापन प्रणालीलाई प्रभावकारी रूपमा कार्यान्वयन गर्ने क्रममा कर्मचारीहरूको नियमित स्वास्थ्य परीक्षणलाई महत्वपूर्ण कार्यक्रमका रूपमा अघि बढाइएको कम्पनीले जनाएको छ । कम्पनीका अनुसार स्वस्थ र सुरक्षित कर्मचारी नै उत्पादनशील उद्योगको आधार भएकाले कर्मचारी तथा उनीहरूका परिवारको स्वास्थ्यप्रति जिम्मेवार बन्ने उद्देश्यले यस्ता कार्यक्रमलाई निरन्तरता दिइनेछ । कार्यक्रमले कर्मचारीहरूमा स्वास्थ्यप्रति सचेतना अभिवृद्धि गर्नुका साथै सुरक्षित, स्वस्थ र जिम्मेवार कार्यस्थल निर्माणमा समेत सकारात्मक योगदान पुर्याउने विश्वास गरिएको छ ।