आज दिउँसो १ बजे एमाले सचिवालय बैठक बस्दै

जानकारी केन्द्र । आज सोमबार दिउँसो १ बजे नेकपा (एमाले) को केन्द्रीय सचिवालय बैठक बोलाइएको छ ।

पार्टी केन्द्रीय कार्यालय ललितपुरस्थित च्यासलमा स्थानीय तह निर्वाचनको समीक्षा गर्न सचिवालय बैठक बस्ने जनाइएको हो ।

आइतबार बसेको केन्द्रीय कार्यालय बैठकले सचिवालयको लागि चार एजेन्डाहरु तयार गरेको थियो । बैठकमा जनप्रतिनिधिलाई असार २ र ३ मा प्रशिक्षण दिनेगरी एजेन्डा बनेको जनाइएको छ ।

यसैगरी, बैठकमा एमाले उपमहासचिव विष्णु रिमालको संयोजकत्वमा बनाइएको चुनावी समीक्षा रिपोर्ट पेस गरिनेछ । साथै, निर्वाचनको समीक्षा सहित स्थानीय तहका जनप्रतिनिधिका लागि प्रशिक्षण, समसामयिक राजनीतिक परिस्थिति र केन्द्रीय विभागको पूर्णताका एजेन्डामा छलफल गरिने उपमहासचिव प्रदीप ज्ञवालीको भनाई छ ।