काठमाडौं । गत वर्षको वैशाख २ गते राति ११ बजे बाँके कोहलपुरका २१ वर्षीय सर्जन विकको मोटरसाइकल दुर्घटना भयो ।
टिप्परमा बालुवा लोड गराउने भनी भे १० प १७२७ नम्बरको मोटरसाइकलमा गई काम सकी घर फर्किने क्रममा जिल्लाको बैजनाथ गाउँपालिका–६ लालपुरको भित्री सडकमा उनी चढेको मोटरसाइकललाई विपरीत दिशाबाट आएको मिनीबसले ठक्कर दिएको थियो । उनलाई बाटोमा लडेको अवस्थामा स्थानीय र प्रहरीले फेला पारी कोहलपुर अस्पताल लगेका थिए । यद्यपि उनको ज्यान भने बच्न सकेन । सो घटनामा मिनीबसका चालक टोपबहादुर राना क्षेत्रीमाथि जिल्ला अदालत बाँकेमा सवारी ज्यान मुद्दा दर्ता भयो ।
अदालतले क्षेत्रीलाई ३० दिन कैद र २ हजार रुपैयाँ जरिवानाको फैसलासमेत सुनायो । अदालतले उक्त घटनालाई सामान्य रूपमा लिँदै मामूली सजायमा आरोपीलाई उन्मुक्ति दियो । तर यो घटना कुनै सामान्य नभएर योजनाबद्ध भएको खुलेको छ । केन्द्रीय अनुसन्धान ब्यूरोका अनुसार मृतकको बीमा रकम असुलीका लागि दुर्घटना गराएर उनको हत्या गरिएको हो । विकको मृत्युपछि उनकी पत्नी सपना मल्लले रिलायन्स लाइफ इन्स्योरेन्सबाट २ करोड ५० लाख रुपैयाँ २०७८ साल साउन १४ गते बीमा भुक्तानी लिएकी थिइन् ।
भुक्तानीपछि गत पुस ३० गते नेपाल पुनर्बीमा कम्पनीले विकको दुर्घटना शंकास्पद भएको भन्दै केन्द्रीय अनुसन्धान ब्यूरोलाई पत्राचार गरेको थियो । ब्यूरोले सोही आधारमा गरेको अनुसन्धानबाट उक्त दुर्घटना योजनाबद्ध रहेको खुलेको बताएको छ । प्रहरीका अनुसार बिकको जीवन बीमा २०७७ साल फागुन २८ गते गरिएको थियो र उनले इच्छाएको व्यक्तिमा पत्नी सपना मल्लको नाम उल्लेख गरेका थिए । सोही वर्षको चैत २ गते सपना र मृतकबीच विवाह दर्ता भएको देखिएको ब्युरोका प्रवक्ता प्रहरी उपरीक्षक श्याम कुमार महतोले बताएका छन् । उनका अनुसार विवाहभन्दा अघि नै विकले इच्छाइएको व्यक्तिमा सपनाको नाम उल्लेख गरेका थिए ।
प्रहरीले यस घटनामा संलग्न सपनासहित ६ जनालाई पक्राउ गरेको छ । प्रहरीले यस घटनाको मुख्य योजनाकार सञ्जिव अर्याल रहेको बताएको छ । सञ्जिवले बीमाबापत सपनाले भुक्तानी लिएको २ करोड ५० लाखमध्ये ८० लाख रुपैयाँ लिएको खुलेको महतोले बताएका छन् । सपनाकी आमा छविकुमारी खत्रीलाई १७ लाख ४६ हजार, दिपक केसीलाई ६० लाख रुपैयाँ दिएर सपनाले ८६ लाख ८९ हजार रुपैयाँ राखेकी थिइन् ।
पेशा र वार्षिक आयको रकमले बीमाको शुल्क ५ लाख ४० हजार रुपैँया तिर्नसक्ने क्षमता विकको थिएन । केवाइसीमा उनको वार्षिक आम्दानी २ लाख रूपैयाँ मात्र भएको स्वस्घोषणा गरेका थिए । वार्षिक आम्दानीको अधिकतम ४० प्रतिशत मात्रै बीमा गर्न सकिने प्रावधान नाघेर विकको बिमा गराइएको पाइएको प्रहरीले जनाएको छ । मृतकको प्राथमिक बिमा शूल्क ५ लाख ४० हजारसमेत सञ्जिवले नै तिरिदिएका थिए ।
श्रीमान्(श्रीमती भनिएका मृतक र सपना आपसी सम्पर्कमै नरहेको पनि प्रहरीको अनुसन्धानमा खुलेको छ । बीमा गराउने सञ्जिब र सपनाबीच भने घटना अगाडिदेखि पैसा बाँडफाडको समयसम्म निरन्तर सम्पर्क भएको र दुर्घटनामा बीमा अभिकर्ता सरदार अहमद खाँको मोटरसाइकल प्रयोग भएको पाइएको प्रहरीले जनाएको छ । घटनाको दिन सञ्जीवको मृतक, सपना, सरदार अहमद र ड्राइभर टोपबहादुरसँग सम्पर्क भएको पाइएको प्रहरीले जनाएको छ । प्रहरीका अनुसार आरती भनिने ललिताकुमारी सापकोटाले सपना र सञ्जीवको भेट गराइदिएकी थिइन् ।
सपनालाई डिपेन्डेन्ट भिसामा अष्ट्रेलिया पठाउने कुरासमेत भएको थियो । सपना २०७७ सालमा सीप सिक्न काठमाडौँ आएकी थिइन् । सोही वर्ष फागुन २८ गते विक र सपनाको विवाह दर्ता गर्न खोजिएको थियो । तर मृतकको उमेर नपुगेका कारण रोकिएको थियो । त्यही नै बेला सपना र बिकको पहिलो भेट भएको थियो । विवाह दर्तापछि उनीहरूको भेट नै नभएको अनुसन्धानमा खुलेको छ । त्यति मात्र नभई उनी विकको दाहसंस्कारमा समेत उपस्थित नभएको पाइएको छ ।
प्रहरीले सपनालाई दिल्ली हुँदै जापान जाने क्रममा गत साउन ९ गते त्रिभुवन विमानस्थलबाट पक्राउ गरेको जनाएको छ । त्यस लगत्तै प्रहरीले ३१ बर्षीय सन्जीब अर्याल, ३२ बर्षीय सरदाम अहमद खाँ, ३३ बर्षीय टोप बहादुर राना क्षेत्री, दिपक के.सी र ललिता सापकोटा (आरती) लाई प्रकाउ गरेको छ ।
