कास्कीमा पहिरोः १ जनाको मृत्यु र २ जना घाइते

काठमाडौं । कास्कीको पोखरा महानगरपालिका-६ डिहिकोपाटनमा पहिरोले घर पुरिएपछि दुई जना घाइते र एक जनाको मृत्यु भएको छ ।

लक्ष्मी खड्का क्षेत्रीको घरमा डेरा गरी बस्ने २६ वर्षीय सन्तोष सुनारको मृत्यु भएको हो । गएराति करिब १ बजे पहिरो गएको जनाइएको छ । कास्कीको माछापुच्छ्रे गाउँपालिका वडा नं.१ भुर्जुङखोला तातोपानी घर भएका उनलाई १ बजेर ५५ मिनेटमा उद्धार गरी पश्चिम क्षेत्रीय अस्पताल लगिएको थियो । जिल्ला प्रहरी कार्यालय कास्कीले डाक्टरहरुले उनलाई २ बजेर २० मिनेटमा मृत घोषणा गरेको जनाएको छ ।

त्यस्तै, पहिरोमा परेर सन्तोषकी दिदी २७ वर्षीया सुनिता सुनार र उनकी १० वर्षीया छोरी सिम्रन सुनार पनि घाइते भएका हुन् । उनीहरुको गण्डकी मेडिकल कलेजमा उपचार भइरहेको छ । प्रहरीले उनीहरुमा बाहिरी चोट नदेखिएको र अवस्था सामान्य रहेको बताए ।

पहिरोको जानकारी पाएलगत्तै जिल्ला प्रहरी कार्यालय कास्कीबाट प्रहरी नायव उपरीक्षक डिएसपी सुन्दर तिवारीको कमाण्डमा २५ प्रहरी र सशस्त्र प्रहरी बल कालिका गणका इन्सपेक्टर उमेश ढकालको कमाण्डमा १५ जनाको टोली उद्धारमा खटिएको थियो ।