काठमाडौँ । निलम्बित प्रधानन्यायाधीश चोलेन्द्रशम्शेर जबराको बयान आज सक्ने तयारी गरिएको छ । महाभियोग सिफारिस समितिले आज बाँकी रहेका प्रश्न सोध्ने तयारी गरेको छ । उक्त सिफारिस समितिका सचिव लक्ष्मीप्रसाद गौतमले आज सवाल र जवाफ सकिने र बाँकी काम अघि बढाइने बताएका छन् ।

बयानको चौथो दिनसम्म ३५ प्रश्न सोधिएको थियो । समितिले हिजो मात्रै २४ वटा प्रश्न सोधेको थियो । समितिले उनका लागि ४२ प्रश्न तय गरेको छ। जवाफ दिने क्रममा जबराले आफ्ना सहकर्मी न्यायाधीशहरु र राजनीतिक दलका शीर्ष नेतालाई आरोप लगाइरहेका छन् । जबराविरुद्ध गत फागुन १ गते प्रतिनिधिसभाका ९८ सांसदले महाभियोग प्रस्ताव दर्ता गरेका थिए । त्यसपछि उनी स्वतः निलम्बनमा परेका छन् । प्रतिनिधिसभाको कार्यकाल असोज १ गते सकिने भएपछि समितिले यसै महिनाको अन्त्यसम्ममा प्रतिवेदन बुझाउने तयारी गरेको छ ।

संसद्ले महाभियोग सिफारिस समिति गठन गरे पनि यही भदौ १ गते पहिलो बैठक बसेको थियो। उक्त समितिको यही भदौ ८ गते बसेको बैठकले जबरालाई बयानका लागि बोलाउने निर्णय गरेको थियो।