म केही वर्षदेखि प्रधानमन्त्रीको दौडमा छैन : प्रचण्ड

चितवन । नेकपा माओवादी केन्द्रका अध्यक्ष पुष्पकमल दाहाल ‘प्रचण्ड’ले आफू प्रधानमन्त्रीको दौडमा नरहेको बताएका छन्।

घटस्थापनामा आज चितवनमा आयोजित शुभकामना आदानप्रदान कार्यक्रममा प्रचण्डले प्रधानमन्त्रीको रेसभन्दा आर्थिक विकास र समृद्धिलाई आफूले पहिलो प्राथमिकता राखेको बताए।

‘मंसिर ४ मा चुनाव आउँदैछ। यहाँ प्रधानमन्त्रीको कुरा पनि आयो। म प्रधानमन्त्रीको रेसमा केही वर्षदेखि छैन,’ उनले भने, ‘मैले चाहेको भए २०७४ मा पाँचै वर्षका लागि प्रधानमन्त्रीको अफर थियो। अहिले पनि छ तर मैले जनताको आर्थिक विकास र समृद्धिलाई पहिलो प्राथमिकता ठानेको छु।’

उनले राजनीतिक स्थिरता, आर्थिक विकास र समृद्धिका अघि प्रधानमन्त्री पद मुख्य नभएको पनि दाबी गरेका थिए।