राष्ट्रपति र प्रधानमन्त्री दुवै पद कांग्रेसले लिन सक्छः गोपालमान श्रेष्ठ

काठमाडौं । नेपाली कांग्रेसको केन्द्रीय निर्वाचन परिचालन समितिका संयोजक गोपालमान श्रेष्ठले प्रतिनिधिसभा तथा प्रदेशसभा निर्वाचनमा पार्टीका उम्मेदवारलाई हराउने अन्तर्घातीलाई छानबिनपछि कारबाही गरिने बताएका छन् ।
‘यसपालि कांग्रेस पराजित होइन, पहिलो पार्टी बनेको छ । यसलाई सफलता नै मान्नुपर्छ । सन्तोष नै मान्नुपर्छ । ९१ सिटमा ६५ भन्दा बढी सिट जित्ने आकलन गरेका थियौं । जित्नुपर्ने केही साथीहरुले हारे । पहिले जितेका ११ ठाउँमा पनि हारेका छौं । ती ठाउँमा पार्टीकै साथीहरुले सहयोग गरेनन् भन्ने कुरा छ । अब अनुगमन रिपोर्ट आउँछ, अनि छानबिन गरेर अनुशासन कमिटीले कारबाही गर्छ,’ प्राइम टाइम्स टेलिभिजनको ‘जनता जान्न चाहन्छन्’ कार्यक्रमका लागि पत्रकार ऋषि धमलासँग कुरा गर्दै श्रेष्ठले भने ।
२०७४ सालको निर्वाचनमा अन्तर्घात गरेका सबैलाई अनुशासन समितिले माफी दिएका कारण यस्तो अवस्था आएको पनि उनले बताए । श्रेष्ठले भने, ‘मैले अनुगमन र अनुशासनको जिम्मा अनुशासन समितिका संयोजक आनन्दप्रसाद ढुंगाना भनिसकेको छु । साथीहरुले पार्टीमा जे गरे पनि हुँदो रहेछ, भन्ने सोच्नुभयो होला, तर त्यसमा छानबिन हुन्छ । यो पार्टी हो, एनजीओ होइन । बीचमा बागी उम्मेदवारी दिनेलाई पनि कारबाही भयो । अन्तर्घातीलाई कारबाही हुन सकेको भए हाम्रो स्थिति सुदृढ हुन्थ्यो ।’
उनले गठबन्धनले बहुमत जुटाउने र कांग्रेसको नेतृत्जमा सरकार बन्ने पनि औंल्याए । श्रेष्ठले भने, ‘हामीले १३८ कटाउँछौं । जसपा फेरि गठबन्धनमै आउँछ । सरकारमा मैले फेरि पनि शेरबहादुरजीकै नेतृत्वको आवश्यकता देखेको छु । यो हाम्रो मात्र नभएर मुलुककै आवश्यकता हो । भरिसक्य देउवालाई नै सर्वसम्मत गराउँछौं । प्रतिस्पर्धा गराउँदा पनि उहाँ नै विजयी हुनुहुनेछ ।’
कांग्रेसमा फेरि पनि देउवा प्रधानमन्त्री हुने भए त्यसका आकांक्षी रामचन्द्र पौडेलदेखि गगन थापासम्मको अवस्था के हुन्छ भन्ने पत्रकार धमलाको प्रश्नमा श्रेष्ठले भने, ‘रामचन्द्रजीदेखि गगनजीसम्मले इच्छा राख्नुभएको छ, चर्चामा आउनुभएको छ । गगनले इच्छा राख्नु, हिम्मत र आँट गर्नु राम्रो कुरा हो । महामन्त्री हुनुहुन्छ, उहाँसँग अझै समय छ । विचार दिन सक्ने नेता पनि हो । रामचन्द्रजी मेरो मित्र हो, छिमेकी हो । उहाँलाई मैले १७ चोटिसम्म भोट हालेको पनि हो । प्रचण्डले राजीनामा गरेपछि उहाँ हुनुुपर्थ्र्यो । दलको नेता हुनुहुन्थ्यो । तर अहिले पनि उहाँको अवस्था देखेको छैन । तैपनि उहाँलाई मेरो शुभकामना छ ।’

देउवापछि प्रचण्ड प्रधानमन्त्री हुने पनि उनले औंल्याए । श्रेष्ठले थपे, ‘प्रचण्डजी पनि प्रधानमन्त्री बन्नुहुन्छ । तर पहिलो चरणमा प्रधानमन्त्री हुने देउवा नै हो । पछि प्रचण्ड र माधव नेपाल दुई वर्ष र एक वर्ष हुनु सक्नुहुन्छ । अरु पद पनि बाँडफाँड हुन्छन् ।’
उनले गठबन्धनमा सहमति भयो भने राष्ट्रपति र प्रधानमन्त्री दुवै कांग्रेसले पनि लिन सक्ने बताए । श्रेष्ठले भने, ‘राष्ट्रपति र सभामुख गरिमामय पद हो । एकचोटि निर्वाचित भएपछि फेर्न मिल्दैन । त्यसका लागि उपयुक्त पात्र चाहिन्छ । गठबन्धनमा समझदारी भयो भने प्रधानमन्त्री र राष्ट्रपति दुवै कांग्रेसले लिन पनि सक्छ अथवा माओवादीलाई दिन पनि सकिन्छ ।’

तपाईं राष्ट्रपति हुने सम्भावना छ कि छैन भन्ने धमलाको प्रश्नमा उनले भने, ‘सबै कुरा सरसल्लाहमा हुन्छ । गठबन्धनमा समझदारी भयो भने म राष्ट्रपति हुन नसक्ने कुरा छैन । राष्ट्रपति भनेको मुलुकको हुने हो, पार्टीका लागि हुने होइन । मुलुकले बनायो भने म बन्न सक्छु ।’