राष्ट्रिय स्वतन्त्र पार्टीमा आखिर किन देखियो विवाद ?

काठमाडौं । रवि लामिछाने नेतृत्वको राष्ट्रिय स्वतन्त्र पार्टी (रास्वपा) को समानुपातिकतर्फ सांसद सिफारिस गर्ने क्रममा विवाद भएको छ । आज बिहिबार पार्टी कार्यालयमा सांसद सिफारिसको विषयलाई लिएर विवाद भएको हो ।

विवादकै क्रममा नेता तथा कार्यकर्ताले पार्टी कार्यालय घेराउ गर्नुका साथै तोडफोड गर्ने चेतावनी दिएका छन् । पार्टीभित्र भएको प्राइमरी इलेक्सनमा कम मत पाएकालाई पनि समानुपातिक सांसदमा सिफारिस गर्ने तयारी भएपछि विवाद बढेको बताइएको छ ।

अहिले पार्टी केन्द्रीय कार्यालयमा ठूलो संख्यामा नेता तथा कार्यकर्ता जम्मा भएका छन् । रास्वपाले निर्वाचनमा सबैभन्दा बढी मत ल्याएकालाई समानुपातिक सूचीको पहिलो नम्बरमा राखेको थियो ।

उसले चुनावमा समानुपतिकतर्फ १३ सिट जितेको छ । तथापि समानुपातिकका केही नामवली रास्वपाले तलमाथि गर्न खोज्दा विवाद सतहमा आएको बताइएको छ ।