खुमलटारमा ६० सांसद जुटेपछि बालुवाटारमा तरंग

काठमाडौं । निर्वाचनको परिणाम सार्वजनिक भैसकेपछि दलहरु नयाँ सरकार गठनको तयारीमा जुटेका छन् । सत्ता गठबन्धनभित्र कसको नेतृत्वमा सरकार बनाउने भन्नेबारे अहिले स्पष्ट भैसकेको छैन् । तर, कांग्रेस र माओवादी केन्द्रमध्ये एकले नेतृत्व गर्नेबारे मोटामोटी सहमति भएको बताईन्छ । निर्वाचनमा जानुअघि नै कांग्रेस सभापति शेरबहादुर देउवा र नेकपा ९माओवादी केन्द्र० का अध्यक्ष पुष्पकमल दाहालबीच सरकारको नेतृत्व आलोपालो गर्ने सहमति भएको चर्चा छ ।

यसअघि नेकपा विभाजनपछि आफूले देउवालाई प्रधानमन्त्री बनाएकोले अब निर्वाचनपछि आफूलाई सरकारको नेतृत्व गर्न दिनुपर्ने दाहालको अडान छ । तर, देउवाले दाहाललाई प्रष्ट रुपमा सरकारको नेतृत्व तपाईँ गर्नुहोस भनेर अहिलेसम्म मुख खोलेका छैनन् । यो निर्वाचनमा माओवादीले तेस्रो निर्णायक शक्ति बन्ने दाबी गरेको थियो । तर, उसले सोचेजस्तो परिणाम आएन । प्रत्यक्ष र समानुपातिक दुवै गरेर माओवादीको संसदमा ३२ सिटको प्रतिनिधित्व छ । सरकार बनाउन १३८ सांसद चाहिन्छ । कांग्रेस संसद्को ठूलो दल भएको नाताले गठबन्धनभित्र कांग्रेसले नै नेतृत्व गर्नेबारे कुनै विमति छैन् ।

उता, दाहाल भने माधव नेपाल, उपेन्द्र यादव, सिके राउत, रेशम चौधरीको दल र स्वतन्त्र सांसदलाई एक ठाउँमा राखेर सत्ताको बागडोर सम्हाल्न लागिपरेका छन् । माधव नेपाल नेतृत्वको नेकपा ९एकीकृत समाजवादी० सँग त माओवादीले एकता नै गर्ने तयारी गरेको छ । यसको लागि दुवै दलका नेतृत्व तहका नेताहरुबीच सहमति जुटिसकेको छ । उता, उपेन्द्र यादव नेतृत्वको जसपा पनि प्रचण्डसँग सहकार्य गर्न तयार भएको छ। प्रचण्डले आफूसँग अहिलेपनि ६० भन्दा बढि सांसदहरु रहेको बताउने गरेका छन् ।

प्रचण्डले ६० प्लस सांसद आफ्नो पक्षमा उभ्याउन खोजेपछि अहिले बालुवाटारमा तरंग पैदा भएको छ । विशेष सूत्रका अनुसार कांग्रेस सभापति शेरबहादुर देउवाले पनि दाहालले यदि ६० भन्दा बढि सांसद आफ्नो पक्षमा उभ्याउन सकिरहे भने सरकारको नेतृत्व पहिलो चरणमा प्रचण्डलाई गर्न दिनेबारे पनि सोच्न सकिने बताउन थालेका छन् । कांग्रेसमा संसदीय दलको नेताको लागि निर्वाचन हुँदैछ । त्यसको लागि देउवाले तयारी थालिसकेका छन् । यसपटक देउवालाई महामन्त्री गगनकुमार थापाले चूनौति दिने घोषणा गरिसकेका छन् ।