हर्क साम्पाङले घर माथि चलाए डोजर, स्थानीय बासिन्दाले गरे ढुंगामुढा

धरान । धरान उपमहानगरपालिकाले आज सार्वजनिक जग्गा मिचेर बनाइएका घर र संरचना माथि डोजर चलाएको छ । उपमहानगरले आइतबार डोजर लगाएर भत्काएको हो ।

नगर प्रमुख हर्क साम्पाङको निर्देशनमा अतिक्रमण गरी बनाइएका घर भत्काउने अभियान थालिएको छ । आज आइतबार ठूलो संख्यामा सुरक्षाकर्मीसहित डोजर लगाएर वडा नम्बर ५ मा रहेको अँधेरी खोला किनारको जग्गामा निर्मित घर भत्काइएको हो ।

सो क्रममा केही बेर स्थानीयबासी र सुरक्षाकर्मी बीच झडप समेत भएको छ । झडपका कारण डोजरको सिसा फुटेको र केही स्थानीय व्यक्ति घाइते भएको जनाइएको छ । ठूलो संख्यामा रहेका नेपाल प्रहरी, सशस्त्र प्रहरी र नगर प्रहरीले तत्कालै स्थिति नियन्त्रणमा लिएका थिए ।

धरान ५ को खारखोला र अधेरी खोलाको संगमस्थलमा नगरपालिकाले बहुजातीय रंगशाला बनाउने निर्णय गरेको छ । सो सार्वजनिक क्षेत्रमा अतिक्रमण गरेर पक्की घर बनाएपछि उक्त संरचना आज हटाइएको हो ।