हामीले पाँच दलीय गठबन्धन तोडेर अर्को एउटा सरकार बनाएका छौं : ओली

काठमाडौँ । नेकपा (एमाले) का अध्यक्ष केपी शर्मा ओलीले अहिले देश भित्र र बाहिरका शक्तिहरू देश बरबाद पार्न सक्रिय रहेको बताएका छन् । आज (मंगलबार) अनेरास्ववियुको २३ औं राष्ट्रिय सम्मेलनलाई सम्बोधन गर्दै उनले यस्तो बताएका हुन्।

अध्यक्ष ओलीले नेकपा एमाले देश बचाउने सुरक्षागार्ड जस्तो रहेको पनि प्रस्ट्याए । अनेरास्ववियुको २३ औं राष्ट्रिय सम्मेलनलाई सम्बोधन गर्दै ओलीले भने, ‘हामीले पाँच दलीय गठबन्धन तोडेर अर्को एउटा सरकार बनाएका छौं । यो सफलताको कुरा हो । हाम्रो पार्टीका आम साथीहरु प्रसन्न भएको देखिन्छ । प्रसन्न हुनुपर्दछ तर कथंकदाचित यो स्थिति फेरियो भने रु। यो संसद्को बनावट नै अस्थिरताको कारक हुने बनावट छ । बहुमत कसैको छैन, हाम्रो पार्टीसँग पनि छैन । बहुमतभन्दा निकै तल सिट छ । भित्र र बाहिरका धेरै शक्तिहरू यो देश बरबाद पार्न क्रियाशील छन् ।’

उनले कुनै डाकाले बैंकमा डकैती गनुपर्यो भने पहिला पालेलाई आक्रमण गर्ने भन्दै पालेकै अवस्थामा देश जोगाउने काममा एमाले लागेको सुनाए ।

नेकपा एमालेका अध्यक्ष केपी शर्मा ओलीले पार्टीको विद्यार्थी संगठन अनेरास्ववियुमा आवद्ध विद्यार्थीलाई शालीन र विनम्र हुन आग्रह गरेका छन् । मंगलबार अनेरास्ववियुको सम्मेलन उद्घाटन गर्दै उनले परिचय पत्र देखाएर अनेरास्ववियुको विद्यार्थी भन्नुपर्ने अवस्था आउन नदिन आग्रह गरे । ‘परिचयपत्र देखाएर अनेरास्ववियुको विद्यार्थी भन्नु नपरोस्, विचारबाट, कामबाट, विनम्रता र शालीताबाट अनेरास्ववियुको विद्यार्थी भन्ने चिन्न पाइयोस्’ उनले भने ।

ओलीले अगाडि भने, ‘अनेरास्ववियुको विद्यार्थी भनेर तपाईं बसमा हिँड्दा तपाईंको ब्यवहार देखेर कति खराब रहेछ को मान्छे हो यो भन्दा म अनेरास्ववियुको हो भनेर कार्ड देखाउने होइन । तपाईको शालीनताले, तपाईको व्यवहारले, बिनम्रताले, मुस्कानले र आदरयुक्त ब्यवहारले बाबु अनेरास्ववियुको विद्यार्थी हो, बहिनी अनेरास्ववियुको विद्यार्थी हो भनेर सोधुन् न १’