काठमाडौं । नवनिर्वाचित राष्ट्रपति रामचन्द्र पौडेललाई चीनले बधाई दिएपछि भारतिय मिडियाले सीले जाल फ्याकेको भन्दै समाचार प्रकाशित गरेको छ । बीआरआई विषयलाई लिएर भारतिय मिडियाले जाल फालेको भन्दै समाचार प्रकाशित गरेको हो ।
चिनियाँ राष्ट्रपति सी चिनफिङले मंगलबार नवनिर्वाचित राष्ट्रपति रामचन्द्र पौडेललाई बधाई दिँदै दुई देशबीचको परम्परागत मित्रतालाई अझ प्रगाढ बनाउन, आपसी राजनीतिक विश्वासलाई सुदृढ गर्न र बेल्ट एण्ड रोड सहकार्यलाई उच्च गुणस्तरीय प्रगति गर्न आफूसँग काम गर्न इच्छुक रहेको बताउनुभएको छ ।
सी चिनफिङले आफ्नो बधाई सन्देशमा चीन र नेपाल हिमाल र पानी साझा गर्ने मित्रवत छिमेकी भएको बताएका छन् । आफ्नो सन्देशमा सीले भने, ‘सन् १९५५ मा कूटनीतिक सम्बन्ध स्थापना भएदेखि नै दुई देशबीचको सम्बन्धले स्वस्थ र स्थिर विकास कायम राख्दै ठूला र साना देशहरूबीच शान्तिपूर्ण सहअस्तित्व, मित्रता र पारस्परिक सहयोगको उत्कृष्ट उदाहरण प्रस्तुत गरेको छ ।’
‘नेपालसँग काम गर्न चीन तयार’
अभूतपूर्व तेस्रो पाँच वर्षे कार्यकालका लागि चीनको राष्ट्रपतिमा पुनः निर्वाचित भएका सीले नेपाल(चीन सम्बन्धको विकासलाई आफूले ठूलो महत्त्व दिएको र दुई देशबीचको परम्परागत मित्रतालाई अझ प्रगाढ बनाउन, आपसी राजनीतिक विश्वासलाई सुदृढ गर्न र आपसी विश्वासलाई सुदृढ गर्न प्रतिबद्ध रहेको बताउनुभयो ।
दुई देशबीच उच्चस्तरीय सहयोग प्रवर्द्धन गर्ने, गुणस्तरीय बेल्ट एण्ड रोड कोअपरेसन (बिआरआई परियोजना) लाई अगाडि बढाउन पौडेलसँग काम गर्न इच्छुक रहेको बताउनु भएको छ ।
बिआरआई परियोजना के हो ?
चीनको महत्वाकांक्षी (बेल्ट एण्ड रोड इनिसिएटिभ) बिआरआई परियोजना राष्ट्रपति सी जिनपिङले सन् २०१३ मा सत्तामा आएपछि सुरु गरेको बहु(अरब डलरको पहल हो । यसको उद्देश्य दक्षिण पूर्व एसिया, मध्य एसिया, खाडी क्षेत्र, अफ्रिका र युरोपलाई स्थल र समुद्री मार्गको सञ्जालमार्फत जोड्नु हो ।
तर, ५० अर्ब डलरको आयोजनामा तथाकथित चीन–पाकिस्तान आर्थिक करिडोर (सीपीईसी) समावेश भएकाले भारतले बीआरआईमा आपत्ति जनाएको छ । सीपीईसी पाकिस्तान प्रशासित कश्मीर (पीओके) हुँदै जान्छ ।
चीनले बिआरआई अन्तर्गत ट्रान्स हिमालयन कनेक्टिभिटी प्रोजेक्ट लगायत विभिन्न पूर्वाधार निर्माणका माध्यमबाट नेपालमा आफ्नो प्रवेश बढाउँदै आएको छ । बेइजिङले नेपाल र चीनबीच ट्रान्स हिमालयन विद्युतीय प्रसारण लाइन र रेलवे नेटवर्क निर्माण गर्न नेपालसँग बीआरआई फ्रेमवर्क सम्झौतामा हस्ताक्षर गरेको छ ।
