रास्वपाका ‘तीन भाइ’को लक्ष्य- उपनिर्वाचनमा क्लिनस्वीप, अर्को चुनावमा दुई तिहाइ

काठमाडौं । राष्ट्रिय स्वतन्त्र पार्टी (रास्वपा) ले उपनिर्वाचन हुने तीनै क्षेत्रमा ‘क्लिनस्वीप’ गर्ने दाबी गरेको छ । शनिबार तीनवटै निर्वाचन क्षेत्रका उम्मेदवार तय गर्दै रास्वपाले उपनिर्वाचनमा तीनै सिट जित्ने दाबी गरेको हो ।

पार्टीले चितवन-२ मा सभापति रवि लामिछाने, तनहुँ(१ मा अर्थविद् डा। स्वर्णिम वाग्ले र बारा-२ मा पूर्वएआइजी रमेश खरेललाई टिकट दिएको छ । पत्रकार सम्मेलनमा तीनै उम्मेदवारले सम्बन्धित क्षेत्रमा आफूहरू विजयी हुने दाबी गरे । उपनिर्वाचन हुने तीन क्षेत्रमा रास्वपाले ‘क्लिनस्वीप’ गर्ने उनीहरूको दाबी छ ।

सभापति लामिछानेले स्वर्णिम वाग्ले र रमेश खरेललाई हराउने कल्पना पनि गर्न नहुने भन्दै उपचुनावपछि ‘तीन भाइ’ -तीनै जना-जितेर घण्टाघरमा विजय उत्सवमा पत्रकार सम्मेलन गर्ने उद्घोष गरे । आफ्नो पार्टीले आगामी चुनावमा दुई तिहाइ बहुमतको सरकार बनाउने सभापति लामिछानेको दाबी छ ।

आफ्नो पार्टीमा स्वर्णिम वाग्ले र रमेश खरेलजस्ता हजारौँ क्षमतावान् मानिसहरू जोडिने भन्दै लामिछानेले आउँदो चुनावपछि बहुमतको सरकार बनाउने परिकल्पना आफूले गरेको बताए । वाग्ले र खरेलजस्ता विज्ञहरू आफ्नो पार्टीमा आउनु सिंगो देशका लागि उज्यालोको संकेत भएको उनले बताए ।

‘आजको कार्यक्रम हजारौँ क्षमतावान् मानिसहरू जोडिन आँटेको जनाउ घण्टीमात्रै हो । सम्पूर्ण होइन । आज हामी तीन भाइ छौँ । तपाईँहरूको आगमनले हुर्कँदै गरेको पुस्तालाई भरोसा दिएको छ,’ सभापति लामिछानेले भने, ‘निराशाको एउटा ठूलो बादल छाएको ठाउँमा आशाको किरण बालिदिनुभएको छ । एउटा ज्योति बालिदिनुभएको छ । म त्यो दिनको परिकल्पना गरिरहेको छु, जतिखेर हामीले दुई तिहाइको सरकार बनाउने छौँ । तपाईँहरूजस्तो विज्ञहरूले मन्त्रालयहरू हाँक्नुहुनेछ ।’

वैशाख १० गते प्रतिनिधिसभाका तीनवटै क्षेत्रमा उपनिर्वाचन हुँदैछ । तनहुँ-१ मा सत्ता गठबन्धनका तर्फबाट गोविन्द भट्टराई उम्मेदवार छन् एमालेले सवेन्द्र खनाललाई उम्मेदवार बनाउने निर्णय गरेको छ । चितवन-२ मा नेपाली कांग्रेसका जितनारायण श्रेष्ठलाई उम्मेदवार बनाउने निर्णय गर्दा एमालेले रामप्रसाद न्यौपानेलाई उम्मेदवार बनाउने निर्णय गरेको हो ।

बारा-२ मा जनमत पार्टीले शिवचन्द्र कुशवाहालाई उम्मेदवार बनाउने निर्णय गरेको छ भने जनता समाजवादी पार्टीका अध्यक्ष उपेन्द्र यादव र लोकतान्त्रिक समाजवादी पार्टीका वरिष्ठ नेता राजेन्द्र महतो उम्मेदवार हुने तयारी छ । सत्ता गठबन्धन र एमालेले उम्मेदवार तय गरेका छैनन् ।