रविविरुद्धको मुद्दा सिन्हाको इजलासमा

काठमाडौँ । राष्ट्रिय स्वतन्त्र पार्टी (रास्वपा) का सभापति रवि लामिछानेविरुद्ध सर्वोच्च अदालतमा परेको मुद्दा न्यायाधीश अनिलकुमार सिन्हाको एकल इजलासमा परेको छ । नागरिकता दुरुपयोगसम्बन्धी मुद्दा चलाउन माग गर्दै सर्वोच्चमा दाययर भएको रिट न्ययायाधिश सिन्हाको एकल इजलासमा परेको हो । अमेरिकी नागरिक रहेकै अवस्थामा नेपाली नागरिकता दुरुपयोग गरेर राहदानी लिएपनि उनीविरुद्ध मुद्दा नचल्ने भनी महान्यायाधिवक्ता कार्यालयले गरेको निर्णय बदर हुनुपर्ने र उनीमाथि अनुसन्धान गरी मुद्दा चलाउने आदेश हुनुपर्ने माग गर्दै युवराज सफलले गत सोमबार रिट दायर गरेका थिए ।

नागरिकता दुरुपयोग गरेको भनी परेको उजुरीमा अनुसन्धान गरेको प्रहरीले रविमाथि मुद्दा नचल्ने रायसहित प्रतिवेदन पेश गरेको थियो । त्यही प्रतिवेदनका आधारमा सरकारी वकिलको कार्यालयले मुद्दा नचल्ने भनी गरेको निर्णयलाई महान्यायाधिवक्ता कार्यालयले सदर गरेको थियो । यसपछि रविविरुद्ध मुद्दा दायर भएको हो । सफलले रविलाई नागरिकता दुरुपयोगको उजुरीमा गैरकानुनीरूपमा उन्मुक्ति दिइएको दाबी गरेका छन् ।

रवि अहिले उपनिर्वाचनमा चितवन २ मा उम्मेदवार बनेका छन् । गत मंसिर ४ को निर्वाचनमा सोही क्षेत्रबाट निर्वाचित उनको पद नागरिक विवादका कारण गुमेको थियो । अहिले पुन: राहदानी विवादमा उनीविरुद्ध मुद्दा परेको हो । रविविरुद्ध उपनिर्वाचनका लागि मनोनयन दर्ता गरेकै दिन मुद्दा परेको थियो ।