काठमाडौं । नक्कली भुटानी शरणार्थी प्रकरणमा उच्चपदस्थ व्यक्तिहरु मुछिएको र पक्राउ पर्ने क्रम सुरु भएको छ । प्रहरीले यो प्रकरणमा उच्च मनोबल लिएर छानिबन थालेको छ। प्रधानमन्त्री पुष्पकमल दाहालले यो प्रकरणमा मुछिएका दोषी जोसुकै भएपनि कारबाहीको दायरामा ल्याउने बताउँदै आएका छन् । आज कांग्रेस नेता तथा पूर्व गृहमन्त्री बालकृष्ण खाँण पक्राउ परेपछि राष्ट्रिय स्वतन्त्र पार्टीका सभापति एवम् पूर्व गृहमन्त्री रवि लामिछानेले नेपाल प्रहरी, गृहमन्त्री र प्रधानमन्त्रीलाई धन्यवाद ज्ञापन गरेका छन् ।
प्रहरीले आज नेपाली कांग्रेसका प्रभावशाली नेता तथा पूर्व गृहमन्त्री बालकृष्ण खाँणलाई पक्राउ गरेको छ । उनलाई आज उनको निवासबाटै पक्राउ गरिएको हो । यसअघि एमाले सचिव टोपबहादुर रायमाझीलाई पक्राउ पुर्जी जारी गरिसकेको छ । उनी भने अहिलेसम्म फरार छन् । राजनीतिक व्यक्तिहरु पक्राउ नपरेको भन्दै आज विहानमात्रै लामिछानेले प्रधानमन्त्रीलाई एउटा तोड पड्काउन यत्रो सकस भनेर प्रश्न सोधेका थिए ।
तर, उनको स्टाटस आएको एक घण्टा नबित्दै खाँण पक्राउ परेका थिए । त्यसपछि लामिछानेले नेपाली प्रहरी, गृहमन्त्री नारायणकाजी श्रेष्ठ र प्रधानमन्त्री पुष्पकमल दाहाललाई धन्यवाद ज्ञापन गरे । र, यो शिलशिला कुनैपनि हालतमा नरोकियोस भनेर माग गरेका छन् ।
उनले लेखेका छन्–धन्यवाद नेपाल प्रहरी, धन्यवाद गृहमन्त्री ज्यु, धन्यवाद प्रधानमन्त्री ज्यु, यो शिलशिला नरोकियोस्, कुनै हालतमा नरोकियोस्।
शिर्ष नेताहरुको तिब्र भेटघाट, फरार (गराइएका) अझै सम्पर्क विहिन, नाम आएकाहरु माथीको अनुसंधान फितलो!!! खबरदार, अनुसंधानको लहरोले ठुला नेता र तिनका सन्तानको “जगजाहेर तान्डव”लाई छोड्यो भने रास्वपा हेरेर मात्रै बस्दैन।यो आँधीलाई ख्याल सम्झने भुल नगर्नु होला। प्रधानमन्त्री ज्यु, एउटै फाइलले ज्वरो निकाल्यो त रु एउटा तोप पड्काउन यत्रो सकस!!
