काठमाडौं । प्रधानमन्त्री पुष्पकमल दाहाल ‘प्रचण्ड’ को अभिव्यक्तिलाई लिएर नेकपा (एमाले) ले सदन अवरुद्ध गर्ने भएको छ । आज (बुधबार) बस्ने प्रतिनिधि सभाको बैठकमा प्रधानमन्त्री प्रचण्डले आफूले बोलेको विवादास्पद अभिव्यक्तिको स्पष्टीकरण दिनुपर्ने एमालेको माग छ ।
प्रितम सिंहको नेपाल आगमनदेखिको संस्मरण समेटेर लेखेको पुस्तक ‘रोडस टू द भ्याली’ नामक पुस्तक विमोचन कार्यक्रममा बोल्दै उनले प्रचण्डले आफूलाई प्रधानमन्त्री बनाउन सिंह धेरै पटक दिल्ली धाएको बताएका थिए।
‘उहाँ राजनीतिमा पनि रुचि राख्नुहुन्छ। उहाँले एकपटक मलाई प्रधानमन्त्री बनाउन धेरै मेहनत गर्नुभयो। धेरैचोटि दिल्ली पनि जानुभयो। काठमाडौंका पार्टी र नेताहरुसँग पनि लगातार छलफल गर्नुभयो,’ उनले भनेका थिए।
सोही कार्यक्रममा बोल्दै प्रचण्डले सिंहले आफूलाई धेरै ठूलो सहयोग गरेको र ठूली छोरीलाई क्यान्सर हुँदा पनि तिनै सिंहले ठूलै सहयोग गरेको हुँदा आफू उनीप्रति नतमस्तक रहेको बताएका थिए।
प्रचण्डको सिंहले आफूलाई प्रधानमन्त्री बनाउन दिल्ली धाएको अभिव्यक्तिलाई लाएर ठूलै बहस भइरहेको छ। विभिन्न नेताहरू तथा राजनीतिक विश्लेषकहरूले टिकाटिप्पणी गरिरहेका छन्।
नेकपा (एमाले) सचेतक महेश बर्तौलाले नेपालमो सार्वभौम संसद्ले बनाएको प्रधानमन्त्रीले यस्तो अभिव्यक्ति दिनुलाई सामान्य मान्न नहुने बताए । प्रधानमन्त्रीको उक्त अभिव्यक्तिलाई सामन्य हिसाबबाट हेर्न नहुने बर्तौलाको भनाई छ । बर्तौलाले प्रधानमन्त्री प्रचण्डले सिंगो जनादेशको अपमान हुने अभिव्यीक्त दिएको आरोप लगाए । प्रचण्डको यस प्रकारको अभिव्यक्तिले नेपाली जनताको स्वाभिमान र नेपालको सार्वभौमतामाथि आघात पुगेको उनले बताए ।
‘प्रधानमन्त्रीजीले जे बोल्नु भएको छ, यो सामन्य विषय होइन, यो असामन्य विषय हो । असामन्य विषयलाई सामन्य ढंगबाट हेर्नु राम्रो हु्ँदैन । सदनमा यो विषयले प्रवेश पाउनु पर्छ र पाउँछ । प्रधानमन्त्रीको नीजि मामिला होला, उनले त्यसो गरे होलान्, उनको फरक विषय हो तर, देशको प्रधानमन्त्रीले, संसद्ले बनाएको प्रधानमन्त्रीले यस्तो अभिव्यक्ति दिने कुराले सिंगो जनादेशको अपमान भएको छ,’– रिपोर्टर्स नेपालका लागि पत्रकार मोहन बुढाक्षेत्रीसँग कुराकानी गर्दै बर्तौलाले भने ।
