काठमाडौं । प्रधानमन्त्री पुष्पकमल दाहाल ‘प्रचण्ड’ ले सरदार प्रितम सिंहको जीवनीमा आधारित भएर लेखिएको पुस्तक विमोचनका क्रममा दिएको अभिव्यक्तिलाई लिएर एमाले सांसदहरुले संघीय संसद्का दुवै सदन अवरोध गरिरहेको छ ।

एमालेको अवरोधका कारण मिटरब्यज समस्या समाधान गर्नका लागि बनेको विधेयकसमेत निष्कृय भईसकेको छ । संसद्को गतिरोध अन्त्यका लागि हिजो (आईतबार) तीन दलका शीर्ष नेताहरुको बैठक बस्यो । प्रधानमन्त्रीको कार्यालय सिंहदरबारमा बसेको बैठकमा नेकपा (माओवादी केन्द्र) का अध्यक्षसमेत रहेका प्रधानमन्त्री प्रचण्ड, नेकपा (एमाले) अध्यक्ष केपी शर्मा ओली र नेपाली कांग्रेसका सभापति शेरबहादुर देउवा सहभागी थिए ।

तीन नेताबीच प्रधानमन्त्रीले संसद्मा आफ्नो अभिव्यक्तिबारे स्पष्टीकरण दिने भन्ने सहमति बन्यो । हिजो एक बजेका लागि बोलाइएको बैठक प्रधानमन्त्रीको विशेष आग्रहका तीन बजेका लागि सारिएको थियो ।

सिंहदरबारबाट बाहिरिएपछि ओलीले आफ्ना सांसदहरुलाई उक्त कुराको जानकारी गराए । जानकारीका क्रममा एमालेका सांसदहरुले प्रधानमन्त्रीको सचिवालयको विज्ञप्ति र गृहमन्त्रीको ट्वीटका बारेमा पनि ओलीलाई जानकारी गराए ।

गृहमन्त्रीको ट्वीटर प्रधानमन्त्रीको सचिवालयको विज्ञप्तिको बारेमा अनविज्ञ रहेका ओलीले तत्कालै प्रधानमन्त्री प्रचण्डलाई फोन गरेर सचिवालय र गृहमन्त्रीले लगाएको लान्छना पनि फिर्ता लिन भने । त्यसमा प्रधानमन्त्री सहमत भएनन् । प्रधानमन्त्रीले सचिवालयको विज्ञप्ति र गृहमन्त्रीकोतर्फबाट पनि माफी माग्न पर्ने अवस्था सिर्जना भएपछि हिजोको बैठक स्थगित भएको थियो ।

‘प्रधानमन्त्रीले मलाई बोल्न पनि नदिने तपाईँहरुले भन्नुभयो । बोल्न दिउँ । चित्त बुझ्छ, बुझ्दैन हेरौं भनेपछि त्यहाँ छलफल भयो, हामीले पनि कुरा राख्यो । उहाँका कुरा यस्ता–यस्ता आएका छन् भनेपछि उहाँ (ओली) ले त्यो स्टेटमेन्ट हेर्नु भएको रहिन छ, उहाँले त्यो हेरेपछि तुरुन्तै यस्तो त भन्न नपर्ने, प्रतिपक्षलाई यसरी चार्ज गर्न पाईन्छ ? म प्रधानमन्त्रीसँग कुरा गर्छु भनेर हाम्रै अगाडि उहाँ (प्रचण्ड) लाई फोन गर्नुभयो । के भन्नुभयो भने यो वक्तव्यमा लगाएको लान्छना पनि फिर्ता लिनुस् । प्रतिपक्षलाई यसरी लान्छना लगाउनु हुन्छ भने हामीलाई स्वीकार्य छैन । यसलाई पनि तपाईँले बोल्दा सम्बोधन गर्नुस् है भन्नुभयो । प्रचण्डले मान्नुभएन त्यसपछि ब्रेक भयो,’– एमालेका प्रभावशाली नेता एवं प्रतिनिधि सभा सदस्य रघु्जी पन्तले भने ।