एनपीएलको दोस्रो संस्करण आजदेखि, ८ फ्रेन्चाइज टोली सहभागी

काठमाडौं । नेपाल प्रिमियर लिग (एनपीएल)को दोस्रो संस्करण आजदेखि शुरु हुँदैछ । एनपीएलको उद्घाटन खेल जनकपुर बोल्ट्स र काठमाडौं गोर्खाजबीच आज अपराह्न ४ बजेदेखि सुरु हुनेछ । त्रिवि क्रिकेट मैदानमा हुने एनपीएल पहिलो पटक फ्लड लाइटमुनि हुन लागेको छ । दोस्रो संस्करणलाई भव्य बनाउने योजना अनुसार डे नाइट म्याच गराइएको छ।

एनपीएल दोस्रो संस्करणको पुरस्कार राशि पहिलो संस्करणकै कायम राखिएको छ । पहिलो संस्करणको विजेता जनकपुर बोल्ट्सले १ करोड १० लाख राशिको पुरस्कारसहित उपाधि जितेको थियो । उपविजेता सुदूरपश्चिम रोयल्सले ५१ लाख, तेस्रो भएको कर्णाली याक्सले २५ लाख र चौथो भएको चितवन राइनोजले १५ लाख पाएको थियो ।

एनपीएलमा ८ फ्रेन्चाइज टोली सहभागी छन् । यसपटक जनकपुर बोल्ट्स, सुदूरपश्चिम रोयल्स, कर्णाली याक्स, पोखरा एभेन्जर्स, विराटनगर किंग्स, चितवन राइनोज, काठमाडौं गोर्खाज र लुम्बिनी लायन्स गरी आठ टोलीले विदेशी खेलाडी अनुबन्ध गरेर अभ्यास गरिरहेका छन् । केही विदेशी खेलाडी नेपाल आइपुगेका छन् भने केही आउँदै छन् ।