काठमाडौं । नेपाल टेलिकमले कर्णाली प्रदेशका विभिन्न दुर्गम तथा अति विकट बस्तीहरूमा 2G/4G सेवा विस्तार गर्दै ग्रामीण समुदायलाई पहिलो पटक गुणस्तरीय दूरसञ्चार सेवामा जोडेको छ ।
टेलिकमले हुम्ला जिल्लाको सर्केगाड–३ र ६ मा 2G/4G सेवा सञ्चालनमा ल्याएपछि सर्केगाड गाउँपालिकाका वडा नं. २, ३, ४ र ६ अन्तर्गतका उनापानी, स्यालटाडी, बराई गाउँ, ठुलाचौर, साधेकाट, रिपा र सर्केदेउ जस्ता बस्तीहरू मोबाइल सेवाको पहुँचमा आएका छन् । त्यस्तै हुम्लाकै अदानचुली–६ मा समेत 2G तथा 4G सेवा सुरु भएपछि अदानचुली गाउँपालिकाका वडा नं. २, ३, ४, ५ र ६ तथा सर्केगाड–२ का बस्तीहरू पानचौर, कालिका लगायत क्षेत्रहरू सेवा सुविधामा समावेश भएका छन् ।
दैलेख जिल्लाको गुराँस गाउँपालिकाको पर्यटकीय क्षेत्र गुराँसमा द्धन् सेवा सञ्चालन भएपछि वडा नं. ३, ४ र ५ का बस्ती, गुराँस बजार, गाउँपालिका कार्यालय क्षेत्रमा रहेका बासिन्दा, गोगनपानी र पातीकान्ला लगायतका गाउँहरू पहिलो पटक गुणस्तरीय मोबाइल सेवाबाट लाभान्वित भएका छन् । साथै सुर्खेतको वीरेन्द्रनगर नगरपालिका–१४ को बयलकाँडा तथा बराहताल–९ को लेकगाउँसमेत यस सेवा विस्तारबाट जोडिएका छन् ।
त्यसैगरी जाजरकोट जिल्लाको जुनीचाँदे गाउँपालिकाको कोत्राङ्गमा 2G सेवा सञ्चालनमा आएपछि वडा नं. ७, ८, ९, १० र ११ का गाउँबस्ती सञ्चार सेवामा जोडिएका छन् । डोल्पा जिल्लामा पनि टेलिकमले सेवा विस्तार जारी राखेको छ। ठूलीभेरी नगरपालिका–१० को मिदग्ती लेकमा सञ्चालन भएको फोरजी टावरपछि फोक्सुन्डो ट्रेल, यार्सा पाटन, छेप्का, भोक्पा, सागबारी तथा शे–फोक्सुन्डो राष्ट्रिय निकुञ्ज कार्यालय क्षेत्र, सैनिक ब्यारेक क्षेत्र लगायतका स्थानहरू सञ्चार सुविधामा समावेश भएका छन् ।
टेलिकमले दुर्गम तथा अति विकट क्षेत्रमा समेत निरन्तर सेवा विस्तार गर्दै आएको र यसमार्फत कर्णाली प्रदेशका दर्जनौँ बस्ती सञ्चार पहुँचमा जोडिएको जनाएको छ । हालसम्म देशभरका ७५३ स्थानीय तहमध्ये ७४९ स्थानीय तहमा 2G सेवा पुगेको कम्पनीको तथ्याङ्कमा उल्लेख छ । सरकारको ‘दुर्गममा सञ्चार’ नीतिअनुसार कम प्रतिफल हुने तर उच्च लगानी आवश्यक पर्ने क्षेत्रहरूमा पनि समान प्राथमिकताका साथ सेवा विस्तार गरिएको टेलिकमले जनाएको छ । कम्पनीका अनुसार सेवा विस्तारले दूरदराजका स्थानीय बासिन्दाको दैनिक जीवन, सूचना पहुँच, व्यापार–व्यवसाय तथा आपतकालीन स्थितिमा समन्वयलाई सहज बनाएको छ ।
