एनपीएलमा आज लुम्बिनी र चितवन भिड्दै

काठमाडौं । जारी नेपाल प्रिमियर लिग (एनपीएल) क्रिकेटअन्तर्गत आज एक मात्र खेल हुने भएको छ। नेपाली क्रिकेटको प्रमुख घरेलु फ्रेन्चाइज प्रतियोगिता एनपीएलमा आज लुम्बिनी लायन्स र चितवन राइनोज मैदान उत्रिँदै छन्। खेल दिउँसो ४ बजे त्रिवि क्रिकेट मैदान, कीर्तिपुरमा सुरु हुनेछ।

यो सिजनमा लुम्बिनी लायन्सको पहिलो खेल आज नै हुन लाग्दा चितवन राइनोज भने यसअघि खेलेको आफ्नो पहिलो खेलमा विजयी बनेको थियो। चितवनले पहिलो खेलमा कर्णाली याक्सलाई पराजित गर्दै शानदार सुरुआत गरेको हो।

लुम्बिनी लायन्स यो सिजन पनि रोहित कुमार पौडेलको कप्तानीमा मैदान उत्रिँदैछ। टोलीमा सन्दीप जोरा, विवेक यादवलगायतका राष्ट्रिय खेलाडी समावेश छन्। साथै थोमस ड्राका, डार्सी सर्ट, गुलबदीन नाइब, जेजे स्मिथ र रुबेन ट्रम्पलम्यान जस्ता विदेशी खेलाडीले लुम्बिनीलाई मजबुत बनाएका छन्।

उता, कुशल मल्लको नेतृत्वमा रहेको चितवन राइनोजमा रिजन ढकाल, कलमसिंह ऐरी, देव खनाललगायतका राष्ट्रिय खेलाडीको उपस्थिति छ। विदेशी खेलाडीको रूपमा रवि भोपारा, सोहेल तनवीर, सैफ जैब, डेविड मलान र अल्पेस रामजानी रहेका छन्।

आजको खेलले लुम्बिनीको सुरुआत कस्तो हुने हो भन्ने संकेत गर्नेछ भने लगातार दोस्रो जितका लागि चितवनले उत्कृष्ट प्रदर्शन गर्दै निरन्तरता खोज्नेछ।