२०८३ साल जेठ महिनामा कस्तो रहला त तपाईको भाग्य, हेर्नुहोस् मासिक राशिफल

मेष राशि
मेष राशि हुनेहरूको लागि यो महिना राम्रो रहेको छ । द्वितीय भावमा सूर्यको गोचरले गर्दा सरकारी निकाय, प्रशासन र बैंकिंग सम्बन्धित कामकाजमा सक्रियता बढ्नेछ । धन संचयन वा आम्दानीका नयाँ स्रोतहरू फेला पर्नेछ तर अनावश्यक खर्च र घर सम्बन्धी कुराकानीहरूमा सतर्कता अपनाउनु उपयुक्त हुनेछ । महिनाको मध्यदेखि बुधको तृतीय भावमा गोचरले गर्दा धैर्य र पराक्रमले आँटेको कार्य सम्पादन गर्नमा सफल भइनेछ । पढाइ तथा प्रेम सम्बन्धको दृष्टिकोणले यो समय हजुरको लागि उपयोगी सिद्ध हुनेछ । प्रेम सम्बन्धमा एकअर्काप्रति आकर्षण बढ्नेछ र वैवाहिक सम्बन्धमा सुमधुर संवाद स्थापित हुनेछ । शैक्षिक क्षेत्र फराकिलो हुनाले विद्यार्थीहरूको तर्कशक्तिमा वृद्धि हुनेछ भने बोलि प्रभावशाली रहनेछ । शुक्रको तृतीय स्थानमा गोचरले पारिवारिक सम्बन्धलाई लिएर विषम परिस्थिति निर्माण हुनेछ । धार्मिक क्रियाकलाप भन्दा सांसारिक भोग विषय वस्तुमा मन रमाउनेछ । मंगलको प्रथम स्थानमा गोचरले गर्दा रिस बढ्ने र वैदेशिक काममा समस्याहरू देखापर्ने छ । स्वास्थ्य को दृष्टिकोणले टाउको दुख्ने र सानोतिनो चोटपटक लाग्न सक्छ सचेत रहनुहोस् । खानपानलाई लिएर आहारविहारमा सन्तुलन राख्नु आवश्यक रहेको छ ।

बृष राशि
वृष राशि हुनेहरूको लागि यो समय उत्तम रहेको छ । लग्न स्थानमा सूर्य र बुधको गोचरले गर्दा समय प्रभावशाली रहनेछ । समाजिक रुपमा मानसम्मान र प्रतिष्ठालाई बलियो बनाउन सकिनेछ । आफ्नो मूल्य सिद्धान्त र दीर्घकालीन लक्ष्य प्रति स्पष्टता आउनेछ । अरुको मान्यता खोज्नुभन्दा आफ्नै क्षमता र उपलब्धिमाथि भरोसा गर्ने प्रवृत्ति बढ्नेछ । सरकारी नेतृत्वमा कार्यरत व्यक्तिहरूको लागि विशेष लाभ मिल्न सक्छ । महिनाको मध्यदेखि बुधको द्वितीय भावमा गोचरले गर्दा बोलिको माध्यमले कार्य सिद्ध गर्न सकिनेछ । शुक्रको द्वितीय स्थानमा गोचरले गर्दा पारिवारिक सम्बन्धमा गलतफेमी र परिवारमा मतभेद जस्तो समस्याहरूको समाधान हुनेछ । मंगलको द्वादश भावमा गोचरले गर्दा खर्च बढ्ने सम्भावना देखिन्छ । अनावश्यक वा आकस्मिक कार्यको लागि धन खर्च हुन सक्छ । यात्रा, उपचार वा सुरक्षा सम्बन्धी विषयमा अतिरिक्त लगानी व्यहोर्नुपर्ला । नोकरी वा पेशामा आवेगमा गरिएको निर्णयले आर्थिक दबावको सिर्जना गर्न सक्छ । विद्यार्थी हरुलाई पढाइको क्षेत्रमा सोचे अनुरुप परिणाम प्राप्त हुनेछ । स्वास्थ्यको दृष्टिकोणले अनिद्रा वा मानसिक रूपमा बैचेनी बढ्नेछ । आँखा सम्बन्धी समस्या देखा पर्न सक्छ ।

मिथुन राशि
मिथुन राशि हुनेहरूको लागि यो महिना सामान्य रहेको छ । द्वादश भावमा सूर्यको गोचरले आर्थिक खर्चमा वृद्धि हुनुका साथै स्वास्थ्य र धार्मिक कार्यमा खर्च बढ्न सक्छ । वैदेशिक यात्राको साथै आध्यात्मिक उन्नतिको लागि पनि समय लाभदायी रहनेछ । पुरातत्व विभाग वा आध्यात्मिक खोजप्रति रुचि बढ्नेछ । मंगलको एकादश भावमा गोचरले गर्दा आयका नयाँ अवसरहरू फेला पर्नेछन् । सेयर मार्केटबाट राम्रो लाभ उठाउन सकिनेछ । शुक्रको प्रथम भावमा गोचरले गर्दा वैवाहिक सम्बन्धमा र जीवनसाथीसँग आत्मीयता बढ्नेछ । विलासिताका वस्तुहरूमा धन खर्चका योग छन् । कुनै पनि कुरा बोल्नुभन्दा अघि शब्द चयनमा विशेष ध्यान दिनुहोला । पढाइको दृष्टिकोणले विद्यार्थीहरूलाई यो महिना सकारात्मक सिद्ध हुनेछ । सामाजिक सञ्जाल र वकालत आदिको क्षेत्रमा राम्रो सफलता प्राप्त हुनेछ । नोकरी वा पेशामा अधिनस्थहरूसँग सकारात्मक वातावरण राख्ने प्रयास गर्नुहोला । काममा आलस्य र थकानले गर्दा ध्यान भड्किन सक्छ जस्ले परिणाम ढिलो मिलेको अनुभव हुनेछ । स्वास्थ्यको दृष्टिकोणले यो महिना सामान्य देखिएको छ तर अनिन्द्राको समस्या र आँखासम्बन्धी समस्याले मानसिक तनाव महसुस हुन सक्छ, सचेत हुनुहोला।

कर्कट राशि
कर्कट राशि हुनेहरूको लागि यो महिना राम्रो रहेको छ । एकादश स्थानमा सूर्यको गोचरले आर्थिक पक्ष मजबुत रहनेछ । रोकिएका पुराना कामहरू पुनस् प्रारम्भ हुनेछन् । साझेदारी व्यापारमा लाभ रहनेछ । आत्मविश्वासमा वृद्धिको साथै मान प्रतिष्ठामा वृद्धि हुनेछ । नोकरी वा पेशामा अधिकारी वर्गहरूबाट प्रशंसा पाइएला । सामाजिक क्षेत्रमा सक्रियता बढ्नुका साथै प्रभावशाली व्यक्तिहरूसँग सम्पर्क बढ्नेछ । दशम स्थानमा मंगलको गोचरले गर्दा चुनौतीपूर्ण जिम्मेवारीहरू सम्पादन गर्नमा सफल भइनेछ । प्राविधिक क्षेत्र र प्रतिस्पर्धाको क्षेत्रमा राम्रो सफलता हात लाग्नेछ । पढाइको दृष्टिकोणले यो महिना सकारात्मक रहेको छ । टेक्नोलोजी सम्बन्धी क्षेत्रमा अध्ययनरत विद्यार्थीहरूको लागि परिणाम अनुकूल रहनेछ । प्रेम सम्बन्धलाई लिएर सचेत रहनुहोला । आवेग र अहंकारको कारण सहकर्मीहरूसँग विवादको सम्भावना देखिएको छ, सावधान रहनुहोला । स्वास्थ्यले साथ दिनेछ तर मौसमी बिमारी र असंयमित खानपानले समस्या उत्पन्न गराउला, सावधान रहनुहोस् ।

सिंह राशि
सिंह राशि हुनेहरूको लागि यो महिना उत्तम रहेको छ । सूर्यको दशम स्थानमा गोचरले गर्दा उद्योग,व्यापारमा आफ्नो अलग पहिचान बनाउन सफल भइनेछ । बुवासँगको सम्बन्धमा सुधार आउनेछ भने बुवाको माध्यमबाट नोकरी वा पेशामा विशेष लाभ हुनेछ । कार्य क्षेत्रमा पदोन्नतिको योग छ । प्रशासिनक र राजनीतिक क्षेत्रमा विशेष सफलता हात लाग्नेछ । राजनीतिक क्षेत्रमा जनसमर्थन बलियो हुनेछ । मंगलको नवम भावमा गोचरले गर्दा भाग्यले साथ दिनेछ तर कर्मशील प्रयासद्वारा प्राप्त हुने संकेत देखिएको छ । आफ्नो विचारमा विनम्र र सहिष्णुता लेर आउनुहोस्, जसले गर्दा पारिवारिक सम्बन्ध र आफन्तहरूको मध्य आत्मीयता बढ्नेछ । साहसिक निर्णयले जीवनको दिशा बदल्ने अवसर प्राप्त हुने सम्भावना रहेको छ । शुक्रको एकादश स्थानमा गोचरले गर्दा मित्रता र सम्बन्धहरूमा समझदारी बढ्नेछ । शिक्षाको क्षेत्रमा म्यानेजमेन्ट वा सौन्दर्यगत विषयवस्तुको अध्ययनमा विशेष लाभ प्राप्त हुनेछ । गुप्तरोग सम्बन्धी समस्याले महिनाको अन्त्यतिर सताउन सक्छ । सन्तुलित दिनचर्या बनाएर राख्दा राम्रो फाईदा रहनेछ ।

कन्या राशि
कन्या राशि हुनेहरूको लागि समय राम्रो रहेको छ । सूर्यको नवम स्थानमा गोचरले गर्दा धार्मिक कर्ममा झुकाव बढ्नेछ । ज्ञान प्राप्तिमा रुचि र कार्य क्षेत्रमा सक्रियता बढ्ने संकेत देखिनेछ । पहिला रोकिएका कामहरू सहज रुपमा अघि बढ्नेछन् । कानुनी प्रक्रिया र प्रतिस्पर्धाको क्षेत्रमा विशेष सफलता मिल्नेछ । नोकरी वा पेशामा अनुभवी व्यक्तिबाट उपयोगी मार्गदर्शन प्राप्त हुन सक्छ । पितासँग सम्बन्धित विषयमा ध्यान दिनु राम्रो हुनेछ । धार्मिक र वैचारिक विषयमा अनावश्यक अहंकार र विवादले हानि हुनेछ । आर्थिक विषयलाई विस्तारपूर्वक बुझ्ने प्रयास गर्नुहोला । विद्यार्थीहरूलाई उच्च शिक्षामा अनुभवी व्यक्तिहरूको मार्गदर्शन उपयोगी सिद्ध हुनेछ । विदेश यात्राको योजना पनि सफल बनाउन सकिनेछ । सम्बन्धमा सानोसानो कुराले विवाद बढ्न सक्छ, त्यसैले संयमता राख्न आवश्यक रहेको छ । नोकरी वा पेशामा गोपनीय विषय उजागर हुनाले मनमा मानसिक तनाव बढ्नेछ । प्रेम सम्बन्ध र वैवाहिक जीवनमा प्रेमी वा जीवनसाथीको कुरालाई बुझ्ने प्रयास गर्नुहोला । महिनाको अन्त्यमा वाहन दुर्घटना र जोखिमको समस्या देखिएको छ । स्वास्थ्यमा पेटसम्बन्धी समस्या देखापर्ला । व्यायाम र सन्तुलित आहारमा ध्यान दिनुहोस् ।

तुला राशि
तुला राशि हुनेहरूको लागि महिना सामान्य रहेको छ । अष्टम भावमा सूर्यको गोचरले गर्दा आर्थिक पक्षमा आकस्मिक खर्च वा पुराना आर्थिक दायित्वहरू सक्रिय हुन सक्छन् । कर र ऋण सम्बन्धी विषयमा ध्यान दिनु लाभदायी रहनेछ । जोखिमपूर्ण लगानीबाट सावधान रहनुहोस् । मंगलको सप्तम भावमा गोचरले गर्दा साझेदारीमा नेतृत्व लिने इच्छा बढ्छ र व्यापारिक सम्झौता, सहकार्य र सार्वजनिक व्यवहारमा सक्रियता देखिनेछ । प्रतिस्पर्धात्मक क्षेत्रमा काम गर्ने व्यक्तिहरूका लागि यो समय परिणाममुखी हुन सक्छ । सार्वजनिक छवि बलियो बन्नेछ । शुक्रको नवम भावमा गोचरले गर्दा शत्रुहरू बढेता पनि शत्रुहरूलाई पराजित पार्न सकिनेछ । विद्यार्थीहरूलाई डिजाइन, परामर्श वा सांस्कृतिक क्षेत्रबाट लाभ मिल्नेछ । यात्राको नयाँ अनुभव प्राप्त हुनेछ । विद्यार्थीहरूको ध्यान पढाइमा भन्दा अन्य विषयवस्तुमा धेरै जानेछ । एकाग्रताको कमी देखिएको छ । प्रेम सम्बन्धमा सुरुवाती आकर्षण बढेपनि महिनाको मध्यपछि गलतफहमीको कारण विवाद वा समस्या उत्पन्न होला । कार्य क्षेत्रमा झुठो आरोप लाग्न सक्ला, सावधान रहनुहोस् ।

वृश्चिक राशि
वृश्चिक राशि हुनेहरूको लागि यो महिना राम्रो रहेको छ । सप्तम भावमा सूर्यको गोचरले गर्दा सार्वजनिक जीवनमा स्पष्टता र प्रतिष्ठा ल्याउने समय रहेको छ । परामर्श र जनसम्पर्कसँग सम्बन्धित क्षेत्रहरूमा सक्रियता बढ्नेछ । साझेदारीमा आफ्नो स्पष्ट भूमिका वा नेतृत्व ग्रहण गर्ने अवसर प्राप्त हुन सक्छ । विद्यार्थीहरूको तर्कशक्तिमा वृद्धि हुनुका साथै खेलकुद सम्बन्धी कार्यमा प्रगति हुनेछ । माहको मध्यदेखि बुधको अष्टम स्थानमा गोचरले गर्दा पुराना कागजात र अभिलेखन वा तथ्यहरूको पुनस् परीक्षणबाट महत्वपूर्ण जानकारी प्राप्त गर्ने समय रहेको छ । अनावश्यक चिन्तन र अत्यधिक सोच विचारले मानसिक तनाव झेल्नुपर्ला । मंगलको अष्टम भावमा गोचरले प्रतिस्पर्धात्मक क्षमतामा उल्लेखनीय रूपमा वृद्धि हुनेछ । विरोधहरूलाई साहसपूर्वक सामना गर्ने क्षमतामा वृद्धि हुनेछ । कामकाजमा तीव्रता बढ्छ । अनुशासन कायम गर्ने र कठिन जिम्मेवारी उठाउने शक्ति प्राप्त हुनेछ । वैवाहिक जीवनको दृष्टिकोणले समय उत्तम रहेको छ । जीवन साथीको राम्रो साथ र सहयोग पाइनेछ । प्रेम सम्बन्धमा एक अर्काप्रति आकर्षण र प्रेमको भावना विकसित हुनेछ । सानोतिनो स्वास्थ्यमा समस्या वा घरमा बुजुर्गहरूको स्वास्थ्यलाई लिएर चिन्ता रहनेछ ।

धनु राशि
धनु राशि हुनेहरूको लागि यो महिना राम्रो रहेको छ । षष्ठ स्थानमा सूर्य र बुधको गोचरले गर्दा नोकरी,पेशा र राजनीतिक क्षेत्रमा चुनौतीहरूको सामना गर्नुपर्ला । आत्मविश्वास वा साहसमा वृद्धि हुनेछ । कानुन विपरीत कार्य नगर्नुहोस् । प्रशासनिक कामलाई व्यवस्थित गर्ने अवसर प्राप्त हुनेछ । वित्तीय वा सहकारी संस्थाबाट लाभ मिल्नेछ । दिएको ऋण फिर्ता लिने समय रहेको छ । पारिवारिक वैवाहिक सम्बन्धमा सन्तुलन र प्रतिस्पर्धीहरू माथि विजय प्राप्त गर्न सकिनेछ । शुक्रको सप्तम स्थानमा गोचरले गर्दा पारिवारिक वातावरण समयअनुसार सकारात्मक हुने संकेत देखिनेछ । विवाद तथा द्वन्द सम्झौतामा टुङ्गिनेछ । प्रतिस्पर्धीको दौडमा विजय प्राप्त हुनेछ । आटेको काम हुने समय छ । कृषि उद्योग र व्यवसायमा मनग्य फाइदा हुनेछ । विद्यार्थीहरूको उपलब्धिविहीन काममा समय बित्न सक्छ । शिक्षाको क्षेत्रमा मेहनत अनुरूपको परिणाम प्राप्त हुनेछ । पुरुषार्थी कामले उत्साह जगाउनेछ । आफ्नो सामाजिक अभियानमा शुभचिन्तकहरुले पनि साथ दिनेछन् । पाचन र रक्तचाप सम्बन्धी समस्याले सताउनेछ । वाहन चलाउॅंदा कानुनी नियम नीतिको विशेष ध्यान दिनुहोला ।

मकर राशि
मकर राशि हुनेहरूको लागि समय उत्तम रहेको छ । पञ्चम स्थानमा सूर्य र बुधको गोचरले रचनात्मक क्षेत्रमा कार्यरत व्यक्तिहरू जस्तै लेखक,कलाकार, शिक्षक वक्ता,अनुसन्धानकर्ताहरूका लागि यो समय लाभदायी रहनेछ । आफ्नो प्रतिभा उजागर गर्ने अवसर प्राप्त हुनेछ । समाजमा प्रशंसा र लोकप्रियता बढ्नेछ । नेतृत्व क्षमता र अभिव्यक्ति कौशलतामा उल्लेखनीय सुधार आउनेछ । पञ्चम भावमा सूर्यको प्रभावले अहंकार वृद्धी र आफ्नो विचार मात्रै सही ठान्ने प्रवृत्तिले सानो मतभेद निम्त्याउन सक्ला सावधान रहनुहोला त्यसैले विनम्रता र समझदारी आवश्यक हुनेछ । सन्तानको प्रगति, उपलब्धि वा प्रतिष्ठाले खुसिको अनुभूति गराउछ । सन्तानको शिक्षा र स्वास्थ्यप्रति विशेष ध्यान दिनुपर्ने समय रहेको छ । सकारात्मक सोच भन्दा नकारात्मक सोच हावि हुने सम्भावना रहन्छ । महिनाको मध्यदेखि बुधको षष्ठ भावमा गोचरले शत्रु र विरोधीहरूलाई बुद्धिमत्ताले परास्त गर्न सकिनेछ । कानुनी वा प्रशासनिक विषयमा पनि सकारात्मक प्रगति हुनेछ । स्वास्थ्यलाई हेर्दा खानपान र दिनचर्यामा सचेत रहनु आवश्यक रहनेछ । हड्डी र नशा सम्बन्धी समस्याले सताउन सक्छ, ध्यान दिनुहोला ।

कुम्भ राशि
कुम्भ राशि हुनेहरूको लागि यो महिना सामान्य रहेको छ । चतुर्थ स्थानमा सूर्य र बुधको युतिले गर्दा घरको वातावरणमा केही परिवर्तन वा सक्रियता बढाउन सक्छ । घरको मर्मत, सजावट र वाहन सम्बन्धी कार्यहरूमा बढि ध्यान केन्द्रित हुनेछ । सरकारी कामकाज वा प्रशासनिक विषयवस्तुहरूमा प्रगति हुनेछ । मातासँग सम्बन्धित विषयवस्तुमा विशेष ध्यान आवश्यक रहेको छ । छरछिमेकी वा आफन्तप्रति कुनै कुरालाई लिएर असमझदारी बढ्नेछ संवादद्वारा सुधार गर्नुहोला । महिनाको मध्यदेखि बुधको पञ्चम भावमा गोचरले गर्दा विद्यार्थीहरूको लागि सकारात्मक पक्षको निर्माण हुनेछ । गणितीय विषयवस्तु र अनुसन्धानको क्षेत्रमा विशेष सफलता हात लाग्नेछ । अध्ययन प्रति प्रतिबद्धता बढ्नेछ । आफ्नो विचार मात्रै सही ठान्ने प्रवृत्तिले पारिवारिक वातावरण प्रभावित हुनेछ । पारिवारिक अस्थिरता चिडचिडपन र घरभित्र अहंकार जन्य मतभेद उत्पन्न हुन सक्छ । जीवन साथी वा प्रेमीसँग सुमधुर सम्बन्ध स्थापित हुनेछ । षष्ठभावमा शुक्रको प्रभावले कार्यक्षेत्रमा शत्रुहरू सक्रिय रहनेछन् भने मान सम्मानमा ठेस लाग्न सक्छ । स्वास्थ्यको दृष्टिकोणले खानपान र घाटी दुख्ने समस्या देखापर्नेछ सावधान रहनुहोस् ।

मीन राशि
मीन राशि हुनेहरूको लागि यो महिना राम्रो रहेको छ । सूर्य र बुधको तृतीय स्थानमा गोचरले गर्दा व्यवहारमा परिपक्वता र कार्यक्षेत्रमा कार्य कुशलताको प्रशंसा हुनेछ । मेहनत वा लगनशीलताले अरुको मन जित्न सकिनेछ । नयाँ काम सुरु गर्नलाई हिम्मत बढ्नेछ । लामो समयदेखि रोकिएका योजनाहरू पुनस् सक्रिय हुनेछन् । कठिन परिस्थिति वा प्रतिस्पर्धामा पनि आफूलाई दृढतापूर्वक प्रस्तुत गर्न सकिनेछ । परिश्रमको उचित परिणाम प्राप्त हुने समय रहेको छ । दाजुभाइमा आत्मीयता बढ्नेछ । बुधको चतुर्थ स्थानमा गोचरले गर्दा छोटो दूरीको यात्रामा नयाँ सम्पर्कहरूबाट लाभ लिन सकिनेछ । जग्गा जमिनको बिक्रीबाट विशेष लाभ आर्जन हुनेछ । विद्यार्थीहरूलाई नयाँ सीप सिक्ने, तालिम लिने र प्राविधिक ज्ञानमा विस्तार गर्ने समय रहेको छ । आफ्नो विचार प्रभावशाली रूपमा राख्न सकिनेछ । बोलिमा रुखोपन झल्किनेछ त्यसैले आफूभन्दा ठूलावडाहरूसॅंग बोल्दा शब्द चयनमा ध्यान दिनुहोला । प्रेमीहरूका लागि प्रेम सम्बन्धमा एक अर्काप्रति आकर्षण बढ्नेछ भने वैवाहिक जीवनमा जीवनसाथीसँग राम्रो तालमेल बनाउन सकिनेछ । स्वास्थ्यको दृष्टिकोणले टाउको दुख्ने समस्या र आँखा सम्बन्धी समस्या साथै सानातिना चोट पटक आदिको सम्भावना रहेको छ ।