कोरोना संक्रमणको जोखिम बढेपछि गृहमन्त्रालयले दियो यस्तो निर्देशन

काठमाडौं । कोरोना संक्रमणको जोखिम बढेपछि सरकारले स्वास्थ्य मापदण्ड कडाई गर्न जिल्ला प्रशासन कार्यालयलाई निर्देशन दिएको छ ।गृहमन्त्रालयले सबै जिल्लाका प्रमुख जिल्ला अधिकारीहरुलाई परिपत्र गर्दै भीडभाड हुन नदिने र अनिवार्य रुपमा मास्कको प्रयोग गर्न निर्देशन दिएको हो ।

गृह मन्त्रालयका अनुसार सोमवार नै सबै जिल्लाका सिडियोहरुलाई स्वास्थ्य मापदण्ड पालनामा कडाइ गर्न निर्देशन दिएको हो । जस अनुसार कतिपय जिल्लाहरुले कोरोना जोखिम कम गर्नका लागि निषेधाज्ञा समेत जारी गरिसकेका छन् । नेपालमा कोरोना संक्रमणको जोखिम बढ्न सक्ने बताउँदै स्वास्थ्य तथा जनसंख्या मन्त्रालयले गत चैत ८ गते सभा, सम्मेलनमा रोक लगाउनका लागि आग्रह गरेको थियो ।

त्यसै अनुसार गृहमन्त्रालयले भारतसँगको सीमानाकाबाट नेपाल प्रवेश गर्नेहरुको रेकर्ड राख्नका लागि समेत निर्देशन दिएको छ । कोरोना जोखिम बढेपछि सीमानाकामा चेकजाँच र क्वारेन्टाइन तथा आइसोलेसन सेन्टरहरु अपडेट गर्न समेत सम्बन्धित जिल्ला प्रमुखहरुलाई निर्देशन दिइएको गृह मन्त्रालयले जनाएको छ ।