चमेरोबाट अन्य जनावर हुँदै मानिसमा कोरोना संक्रमण !

एजेन्सी । चमेरोबाट अन्य जनावरमार्फत मानिसमा कोरोनाभाइरस संक्रमण भएको हुन सक्ने सम्भावना प्रबल रहेको पाइएको छ । कोभिड–१९ उत्पत्तिका सम्बन्धमा विश्व स्वास्थ्य संगठन (डब्ल्यूएचओ) र चीनले संयुक्त रुपमा गरेको अध्ययनले यस्तो देखाएको हो ।

कोरोनाभाइरस प्रयोगशालामा बनाइएको सम्भावना भने ज्यादै न्यून रहेको अध्ययनको प्रारम्भिक खाकामा उल्लेख गरिएको समाचार संस्था एपीले जनाएको छ । अध्ययनको निष्कर्ष अपेक्षा गरिएअनुुसार नै भएको र अन्य कैयौँ प्रश्नहरु अनुत्तरित रहेको जनाइएको छ ।

अध्ययन टोलीले भाइरस प्रयोगशालाबाट ‘लिक’ भएको भन्ने परिकल्पना बाहेकका अन्य सबै विषयमा अध्ययन गरेको थियो । तर, नतिजा सार्वजनिक गर्न बारम्बार ढिलाइ हुँदा चीनले अध्ययनलाई प्रभावित पार्न खोजेको आशंका गरिएको छ । चीनमाथि उसले प्रयोगशालामा कोरोनाभाइरस बनाएको भन्ने आरोप लाग्दै आएको छ ।

शोधकर्ताहरुले संक्रमणको सम्भावनालाई चार परिदृश्यमा सूचीबद्ध गरेका छन् । दोस्रो जनावरको माध्यमबाट संक्रमण फैलिएको अधिक सम्भावना रहेको छ भने चमेरोबाट मानिसमा सिधा संक्रमणको पनि सम्भावना रहेको निष्कर्ष निकालिएको छ । यसैगरी, ‘कोल्ड–चेन’ खाद्य शृंखलाको माध्यमबाट संक्रमण फैलिएको सम्भावना ज्यादै न्यून रहेको पाइएको छ ।

कोभिड–१९ संक्रमण गराउने भाइरस र कोरोनाका अन्य भाइरससमेत चमेरोमा पाइएको छ । यद्यपि, चमेरोमा पाइने भाइरस र सार्स–कोभ–२ भाइरस विकास भएको समयको दूरी कैयौँ दशक रहेको पाइएको छ ।

चमेरोमा पाइएको जस्तै भाइरस सालकमा समेत पाइएको छ । न्याउरी मुसा र बिरालोमा समेत कोभिड भाइरस हुन सक्ने आशंका गरिएको छ ।