एशियाकै प्रभावशाली ३० युवाको सूचीमा ” गौरिका”

एशियाकै सर्वाधिक ३० प्रभावशाली युवाको सूचीमा नेपालकी पौडीवाज गौरिका सिंह छानिएकी छिन् । विश्वप्रशिद्ध फोर्बस म्यागाजिनले १८ वर्षीया गौरिकालाई विलक्षण प्रतिभाकी युवा भनेर उल्लेख गरेको छ । गौरिका १२ वर्षको उमेरदेखि नेपालबाट अन्तर्राष्ट्रिय प्रतियोगितामा प्रतिस्पर्धा गर्दै आएकी छिन् । फोर्बस थट्टी अन्डर थट्टी एशिया २०२१ मा उनको योगदान र प्रतिभाबारे वर्णन गरिएको छ । फोर्बसले गौरिका ९ वर्षकै उमेरबाट पौडी खेलमा सक्रिय रहेको उल्लेख गरेको छ ।

२०१६ को रियो ओलम्पिकमा सबैभन्दा कान्छी खेलाडीमा गौरिका थिइन् । २०१९ को दक्षिण एशियाली खेलकुदमा ४ स्वर्ण, २ रजत र ३ काँस्य पदक जित्न सफल भइन् । उनी २०२० को टोकिया ओलम्पिकमा छनोट भएकी छिन् । यो खेल २०२१ का लागि सरेको छ । खेलका अलावा उनी माइती नेपाल र शान्ति एजुकेशन इनिटिएटिमको गुडविल एम्बेसेडर बनेर सामाजिक कार्यमा पनि सक्रिय छिन् । गौरिका नेपालको खेल इतिहासमा एउटै अन्तर्राष्ट्रिय प्रतिस्पर्धामा सबैभन्दा बढी स्वर्ण जित्ने एकमात्र खेलाडी हुन् । उनी दक्षिण एशियाली खेलकुदमा सबैभन्दा बढी पदक जित्ने खेलाडीको सूचीमा पनि छिन् ।