काठमाडौं । काठमाडौं जिल्ला अदालतमा अभिनेत्री मिरूना मगर र फिल्म प्राविधिक पृथ्वीसिंह ठकुरीविरुद्ध फूर्पा साङ्‍मो तामाङले गाली बेइज्जती र कुटपिटसम्बन्धी मुद्दा दर्ता गराएका छन् ।

तामाङले कानुन बमोजिम सजायको माग गरेको काठमाडौं जिल्ला अदालतका सूचना अधिकारी दीपक दाहालले बताएका छन् । काठमाडौंको सिभिल मलमा गत जेठ १५ गते कबड्डी ४ फिल्मको प्रमोसनको भिडभाडमा मिरूनाले आफूमाथि ‘ब्याड टच’ (दुर्व्यवहार) भएको भन्दै फूर्पालाई थप्पड हानेकी थिइन् । उनले प्रहरीमा फूर्पाको अनुचित व्यवहारविरुद्ध उजुरी पनि दिएकी थिइन् ।

तर तामाङ तथा लामा समुदाय भने सार्वजनिक रुपमै विरोधमा उत्रिए र प्रदर्शन भइरहेको मिरुनाको फिल्म कबड्डी ४ रोक्न माग गरे । विरोध बढेसँगै फूर्पालाई प्रहरी छाडेको थियो । त्यसलगत्तै, जेठ १७ गते फिल्मका कलाकार, निर्देशक र लामा गुरुहरु साक्षी राखेर दुवै पक्षबीच माफी माग्ने र दिने सहमति भएको थियो ।

हाल भने फूर्पाले यो विषयलाई उजुरीमा पटकपटक पहल गर्दा पनि अभिनेत्री मिरूनाले माफी नमागेको र बेवास्ता गरेको पाइएपछि मुद्दा दर्ता गर्न बाध्य भएको जनाए । फिल्म प्राविधिक ठकुरीले पनि मिरूनालाई उक्साउएको भन्दै उनीविरूद्ध पनि कारवाही माग गरिएको जनाइएको छ ।