सर्लाहीको एक होटेलमा जुवा खेलिरहेका ७ जना पक्राउ

काठमाडौं । सर्लाही प्रहरीले होटेलमा जुवा खेलिरहेको अवस्थामा एक महिलासहित ७ जनालाई पक्राउ गरेको छ ।

सर्लाही प्रहरीका प्रवक्ता एवं डीएसपी विजय यादवले उनीहरुलाई आइतबार साँझ ६ बजेतिर बागमती नगरपालिका ३ धरहरास्थित घिसिङ होटेलमा जुवा खेलिरहेका अवस्थामा नियन्त्रणमा लिइएको जानकारी दिए । पक्राउ पर्नेमा ३५ वर्षीय सन्चर सिंह घिसिङ, ३२ वर्षीय प्रेमबहादुर बाइबा, हरिवन नगरपालिका ११ बस्ने ३४ वर्षीय मणीलाल बोम्जन, ४२ वर्षीय मनोज कुमार थिङ, ४५ वर्षीय जगत स्याङ्तान, ४१ वर्षीय पनोज कुमार थिङ र बागमती नगरपालिका ३ बस्ने ३० वर्षीया जमुना मोक्तान रहेका छन् ।

प्रहरीले उक्त जुवाखालबाट १६ थान कौडा, एक बुक तास, ५ थान मोबाइलका साथै २ लाख १४ हजार ९७० रुपैयाँ बरामद गरी अनुसन्धान गरिरहेको जनाएको छ ।