रेशम चौधरीको आममाफीमा रास्वपाले भन्यो -‘जघन्य अपराध क्षम्य हुन सक्दैन’

काठमाडौं । राष्ट्रिय स्वतन्त्र पार्टीले रेशम चौधरीलाई आममाफी दिने निर्णयको विरोध गरेको छ । आइतबार विज्ञप्ति जारी गर्दै रास्वपाले राजनीतिक आन्दोलनको आवरणमा हुने जघन्य अपराध क्षम्य हुन नसक्ने बताएको हो ।

मिति २०७२ भदौ ७ गते टीकापुरमा भएको हिंसात्मक घटनामा दोषी ठहरी तीनै तहको अदालतबाट जन्म कैदको सजाय पाएका पूर्व सांसद रेशम चौधरीलाई कैदबाट मुक्त गराउन सरकार नै योजनाबद्ध रूपमा लागिपरेको देखिएको रास्वपाले जनाएको छ ।

प्रधानमन्त्री पुष्पकमल दाहाल स्वंयले सदनको रोस्टमै उभिएर चौधरीलाई छुटाउन विद्यमान कानुनमा संशोधन गरेर होस् या अन्य तरीकाले सरकार लागिपरेको कुरा खुलेर बताएको र सरकारको यो कदम पुर्वाग्रही तथा आममाफीको मर्म विपरीत मात्र नभई पीडितका सन्दर्भमा अन्यायपूर्ण समेत रहेको राष्ट्रिय स्वतन्त्र पार्टीको ठहर रहेको विज्ञप्तिमा उल्लेख छ ।

सरकारले गणतन्त्र दिवशको अवसरमा सोमबार रेशम चौधरीसहित झण्डै ५ सय कैदीलाई रिहा गर्ने निर्णय गरेको छ । सरकारको सिफारिसमा राष्ट्रपतिले बाँकी कैद मिनाहा गरेपछि उनी आज रिहा भएका छन् ।