असहायको साथमा मेयर कार्यक्रममा अनियमितता, नगरप्रमुख भन्छिन्- ‘दोषीमाथि कारबाही हुन्छ’

रौतहट । मौलापुर नगरपालिकाले सञ्चालन गरेको असहायको साथमा मेयर कार्यक्रममा अनियमितता भएको आरोप लागेको छ । असहायको साथमा मेयर कार्यक्रममा परिवारले छोरीको विवाह गरेमा ३० हजार आर्थिक सहयोग गर्ने निर्णय भएको तर यसको नगरप्रमुख रिनाकुमारी साहले आफूखुशी नजिकका मानिसहरूलाई दिने र अरूलाई यो सुविधाबाट वञ्चित गर्ने आरोप लागेको छ ।

मौलापुर नगरपालिका ८ का ठगा साहले गत वर्ष छोरीको बिहे सम्पन्न भएको तर अहिलेसम्म रकम नपाएको गुनासो गरेका छन् । उनले बिहे भएपछि वडापालिकाले सिफारिश गरेर रकम माग गरिएको तर अहिलेसम्म नपाएको बताए । उनले नगरप्रमुखको नजिकका मानिसहरूले पाउने तर टाढाकाले नपाउने गरेको आरोप लगाए ।

यो कार्यक्रममा केहिले नगरपालिकाबाट सहयोग पाएपछि किर्ते गर्न शुरू गरेको पाइएको छ । मौलापुर नगरपालिका ९ निवासी महेन्द्र राय यादवले गत वर्ष माघ २५ गते छोरीको बिहे गरेको तर अहिले उनले वडाबाट सिफारिश गरेर रकम माग गरेका छन् ।

नगरप्रमुख साहले हिजो बिहेको मिति थियो आफू रकम लिएर यादवको घरमा गएको तर गत वर्ष नै बिहे सम्पन्न भएको थाहा पाएपछि फर्केको बताइन् । वडाध्यक्ष श्यामकिशोर साहले आफूलाई झुक्याएर सिफारिश गराएको बताए ।

उनले पछि आफूले बुझ्दा गत वर्ष नै यादवले छोरीको बिहे सम्पन्न गरेका तर रकम पाउने लोभमा मिति सच्चाएर झुक्याइ सिफारिश लिएको बताए ।

नगरप्रमुख साहले घटना सार्वजनिक भएपछि यस प्रकारका कार्यहरू पहिले पनि भएको हुन सक्ने भन्दै छानबीन समिति गठन गरेर अनुदान सहयोग लिनेहरूको छानबीन गर्ने र दोषी देखिएकाहरूलाई कारबाहीको दायरामा ल्याउने बताइन् ।

नगरप्रमुख साहले भनिन्- “आफूले कसैलाई भेदभाव गरेको छैन् । वडाबाट सिफारिश भएर आएका सबै जनालाई रकम वितरण गरिएको छ ।” उनले कात्तिक र पुस महिनामा ५०/५० जना गरी १०० जनालाई रकम वितरण गरिएको बताइन् ।