सुतिरहेका गोलेमाथि खुकुरी प्रहार, एक जना प्रहरी नियन्त्रणमा

बारा । निजगढ नगरपालिका १२ रामथलीका ३८ वर्षीय भीमलाल गोलेमाथि खुकुरी प्रहार गरेको आशङ्कामा रौतहटको गुजरामाई नगरपालिका ४ बस्ने नन्दलाल राजवंशी भनिने मन्सुर मियाँलाई रौतहट प्रहरीले पक्राउ गरी बारा प्रहरीलाई बुझाएको छ ।

उनलाई बुधबार दिउँसो चन्द्रपुरबाट पक्राउ गरी इलाका प्रहरी कार्यालय, निजगढमा राखी अनुसन्धान भइरहेको इप्रका, निजगढका प्रहरी निरीक्षक सुमित कुशवाहाले जानकारी दिए । मंगलबार राति घरमा सुतिरहेका गोलेमाथि खुकुरी प्रहार भएको थियो ।

निद्रामा रहेका उनीमाथि खुकुरी प्रहार हुँदा घाँटी, टाउको र हातमा गहिरो चोट लागेको थियो । त्यसपछि गोलेले चिच्याउँदै गुहार मागेपछि घटनामा संलग्न व्यक्ति भागेपछि गोलेको ज्यान जोगिएको घटनास्थल पुगेका सुरक्षाकर्मी र स्थानीयहरूले बताएका छन् । उनको हेटौंडास्थित चुरे हिल अस्पतालमा उपचार भइरहेको निजगढ प्रहरीले जनाएको छ ।