काठमाडौं । नेपाली राष्ट्रिय क्रिकेट टोलीका पूर्वकप्तान सन्दीप लामिछानेले खेल जीवनबाट सन्यास लिने संकेत गरेका छन् । सामाजिक सञ्जालमार्फत उनले आफ्ना समर्थक र शुभचिन्तकलाई धन्यवाद व्यक्त गर्दै आफ्नो भावनात्मक निर्णय सार्वजनिक गरेका हुन् ।
लामिछानेले फेसबुकमा लेखेका छन्, “धन्यवाद, सबैलाई, सबै कुराको लागि । यो देश र यस सुन्दर राष्ट्रका विश्वासयोग्य मानिसहरू सधैं मेरो साथमा उपस्थित छन् । मेरो यात्राको हरेक पाइलामा अटल समर्थन प्रदान गर्दै तपाईंको माया र प्रीतिहीन मेरो लागि संसारको अर्थ छ ।”
उक्त पोस्टले उनका प्रशंसकहरूलाई दुविधामा पारेको छ । कतिपयले यसलाई उनले खेल जीवनबाट पूर्ण रूपमा सन्यास लिने संकेतका रूपमा बुझेका छन् भने केहीले यो पोस्टलाई अन्यथा लिएको देखिन्छ । पोस्टमा “ह्यापी रिटायरमेन्ट” भन्ने शुभकामना दिनेहरू पनि छन् भने केहीले यसलाई “नशाका तालमा राति ११ बजे लेखिएको” भन्दै हल्का रूपमा टिप्पणी गरेका छन् ।
यसै पोस्टमा केही फ्यानहरूले लामिछानेले आफ्ना पछिल्ला निराशाजनक प्रदर्शनपछि निराशामा आधारित यो निर्णय लिएको अडकल गरेका छन् । हालै सम्पन्न नेपाल प्रिमियर लिगमा लामिछानेको प्रदर्शन अपेक्षाकृत कमजोर रह्यो । जय ट्रफीमा पनि आशातीत प्रदर्शन गर्न नसक्दा उनले खेल जीवन समाप्त गर्ने सोच बनाएको अनुमान गरिएको छ ।
लामिछानेको यो कदमले नेपाली क्रिकेटमा मिश्रित प्रतिक्रिया उत्पन्न गरेको छ । उनको निर्णयले समर्थकहरूमा गहिरो छाप छोडेको छ भने उनका फ्यानहरूले भविष्यमा उनले जुनसुकै क्षेत्रमा अघि बढेपनि सफलताको कामना गरेका छन् ।
