रौतहटमा १४ वर्षीय बालकको हत्या, चार जना पक्राउ

रौतहट । रौतहट प्रहरीले १४ वर्षीय बालकको हत्यामा संलग्न चार जना अभियुक्तलाई पक्राउ गरेको छ । जिल्ला प्रहरी कार्यालय रौतहटले आइतबार पत्रकार सम्मेलनमार्फत पक्राउ परेका अभियुक्तहरूलाई सार्वजनिक गरेको हो ।

वैशाख ६ गते वृन्दावन नगरपालिका ७ का कृष्णप्रसाद यादवको शव गरुडा नगरपालिका ८ स्थित चाँदी खोलामा फेला परेको थियो । घटनाको अनुसन्धानका क्रममा प्रहरीले सोही स्थानका नागेन्द्र सहनी, साधु भनेर चिनिने अर्का नागेन्द्र सहनी, गौर नगरपालिका ४ का विकास पटेल र अनिल साहलाई पक्राउ गरेको जानकारी दिएको छ ।

प्रहरी उपरीक्षक (एसपी) दिलिप घिमिरेका अनुसार, चारै अभियुक्तले टिकटिक बनाउन जाने बहानामा बालकलाई घरबाट बोलाई चाँदी खोलामा लगेर गोली हानी हत्या गरेका थिए । प्रारम्भिक अनुसन्धानबाट बालकको छातीमा दुई राउन्ड गोली प्रहार गरिएको पुष्टि भएको छ ।

हत्यामा प्रयोग गरिएको पेस्तोल दुर्गा भगवती गाउँपालिका ५ स्थित एक घरमा टिनको बाकसभित्र लुकाइएको अवस्थामा बरामद गरिएको प्रहरीले जनाएको छ । यस्तै, प्रयोग गरिएको भारतीय नम्बर प्लेट (BR-05W-0137) भएको मोटरसाइकल गौरस्थित एक वर्कशपमा टुक्रा पारिएको अवस्थामा फेला परेको छ ।

पक्राउ परेका चारै जनालाई जिल्ला अदालत रौतहटबाट सात दिनको म्याद थप गराई थप अनुसन्धान जारी राखिएको प्रहरी उपरीक्षक घिमिरेले बताए । साथै, घटनामा संलग्न अन्य व्यक्तिहरूको खोजी पनि तीव्र गतिमा भइरहेको प्रहरीको भनाइ छ ।