बन्दीपुर केवलकारको आईपीओ आज बाँडफाँट, २० लाखभन्दा बढीको हात रित्तो

काठमाडौं । बन्दीपुर केवलकार एण्ड टुरिजम लिमिटेडको आईपीओ आज (सोमबार) दिउँसो ४ बजे बाँडफाँट हुने भएको छ। कम्पनीको बिक्री प्रबन्धक नेपाल एसबआई मर्चेन्ट बैंकिङ लिमिटेडका अनुसार बाँडफाँट प्रक्रिया सम्पन्न गर्ने तयारी पूरा भइसकेको छ।

यस आईपीओमा २५ लाख १२ हजार १२२ जनाले २ करोड ९८ लाख ६९ हजार ४४० कित्ता बराबरको करिब २ अर्ब ९८ करोड ६९ लाख रुपैयाँको आवेदन परेको छ। तर भाग्यवश ४ लाख ३४ हजार १०८ जनाले मात्र १० कित्ताका दरले सेयर पाउनेछन्। यसरी करिब २० लाख ७८ हजार १४ जनाको हात रित्तो हुने भएको हो।

कम्पनीले प्रतिकित्ता १०० रुपैयाँ अंकित मूल्यका दरले ५८ लाख ६० हजार कित्ता साधारण सेयर नेपाल धितोपत्र बोर्डबाट गत असार २९ गते स्वीकृति पाएर निष्कासन गरेको हो। पहिलो चरणमा आयोजना प्रभावित स्थानीय बासिन्दाका लागि ५ लाख ६६ हजार कित्ता र वैदेशिक रोजगारीमा रहेका नेपालीका लागि ५ लाख २९ हजार ४०० कित्ता आईपीओ जारी गरी बाँडफाँट भइसकेको छ।

दोस्रो चरणमा कम्पनीले सामूहिक लगानी कोषलाई २ लाख ६४ हजार ७०० कित्ता र कर्मचारीलाई १ लाख ५८ हजार ८२० कित्ता छुट्याएर बाँकी ४३ लाख ४१ हजार ८० कित्ता सर्वसाधारणलाई बिक्रीमा ल्याएको थियो। कम्पनीको आईपीओलाई केयर रेटिङ्स नेपालले ‘केयर एनपी डबल बी इस्यूअर’ रेटिङ प्रदान गरेको छ, जसले कम्पनीको वित्तीय दायित्व बहन गर्ने क्षमतामा मध्यमस्तरको जोखिम रहेको संकेत गर्छ।

बन्दीपुर केवलकार होटल तथा पर्यटन क्षेत्रको कम्पनी हो, जसले आईपीओमार्फत संकलित रकम पर्यटन पूर्वाधार विकासमा उपयोग गर्ने जनाएको छ।