अब झन्झट बिना निरन्तर सेवा : नेपाल टेलिकमको जीएसएम पोस्टपेडमा ‘रिकरिङ अनलिमिटेड प्याक’

काठमाडौं । नेपाल टेलिकमले ग्राहकहरूलाई अझ सहज र निरन्तर सेवा प्रदान गर्ने उद्देश्यले जीएसएम पोस्टपेडका लागि ‘रिकरिङ सिजिलो अनलिमिटेड प्याकेज’ सञ्चालनमा ल्याएको छ । अब ग्राहकले एकपटक मात्र प्याकेज सक्रिय गरेपछि, यसको अवधि सकिए पनि हरेक महिनाको निश्चित मितिमा सो प्याकेज स्वचालित रूपमा नवीकरण हुनेछ ।

टेलिकमले असोज ३१ गतेदेखि लागू हुने गरी सजिलो अनलिमिटेड ६९९, ७९९, ९९९, १४९९ र एक्जेक्युटिभ प्याकलाई मुख्य अफरका रूपमा समावेश गरेको छ । पहिलोपटक प्याकेज खरिद गर्दा अंग्रेजी महिनाको १५ तारिखलाई आधार मानी सोही मितिदेखि बिलिङ चक्र सुरु हुनेछ । त्यसपछि प्रत्येक महिनाको १५ तारिखमा सो प्याकेज स्वतः रिन्यु हुने व्यवस्था मिलाइएको छ ।

अंग्रेजी महिनाको १५ तारिखमा बिलिङ गर्दा ग्राहकको क्रेडिट लिमिट पर्याप्त नभए सेवा अस्थायी रूपमा अवरुद्ध हुने तर भुक्तानीपछि तुरुन्तै पुनः सुचारु हुने व्यवस्था गरिएको छ । प्याकेजमा तोकिएको डाटा वा एसएमएस सकेपछि ग्राहकले अन्य उपलब्ध प्याकेजहरू पनि खरिद गर्न सक्नेछन् ।

ग्राहकले बढी वा कम संसाधन (डेटा, एसएमएस, भ्वाइस) सहितका अन्य रिकरिङ प्याकेज रोज्न वा सामान्य एसएमएस तथा डेटा प्याकेज प्रयोग गर्न पनि स्वतन्त्रता पाउनेछन् । एउटै समयमा दुईवटा रिकरिङ प्याकेज खरिद गरेमा नयाँ प्याकेज पेन्डिङमा रहनेछ र सो प्याकेज आगामी महिनाको १५ तारिखमा मात्र सक्रिय हुनेछ ।

यदि ग्राहकले सेवा बन्द गर्न चाहेमा जीएसएम पोस्टपेड अफरअन्तर्गत ३०० रुपैयाँको सब्स्क्रिप्सनमार्फत रिकरिङ सेवा डिएक्टिभ गर्न सकिने व्यवस्था गरिएको टेलिकमले जनाएको छ ।