हजार दरका ४३ करोड नोट छपाइका लागि राष्ट्र बैंक चिनियाँ कम्पनीसँग सम्झौतामा

काठमाडौं । नेपाल राष्ट्र बैंकले १००० दरका ४३ करोड थान बैंक नोट डिजाइन, छपाइ तथा आपूर्तिका लागि चिनियाँ कम्पनीसँग सम्झौता गर्ने भएको छ। नोट छपाइका लागि चाइना बैंक नोट प्रिन्टिंग एण्ड मिन्टिंग कर्पोरेसन, बेजिङसँग करिब एक करोड ६९ लाख ८५ हजार अमेरिकी डलरको ठेक्का सम्झौता भएको राष्ट्र बैंकले जनाएको छ।

राष्ट्र बैंकका अनुसार यो ठेक्का सार्वजनिक खरिद (चौधौं संशोधन, २०८२) नियमावली, २०६४ को दफा १३७ तथा नोट छपाइ तथा सिक्का टकमरी सम्बन्धी निर्देशिका, २०६५ (दोस्रो संशोधन २०८१ मिलाइएको) को दफा ५४ बमोजिम गरिएको हो।

राष्ट्र बैंकले छापाखाना छनोटदेखि करार प्रक्रियासम्मका सबै कार्य कानुनी प्रावधानअनुसार पूरा गरिएको स्पष्ट जनाएको छ।