एनपीएलमा आज दुई रोचक भिडन्त : बिहान पोखरा–काठमाडौँ, दिउँसो सुदूरपश्चिम–चितवन आमनेसामने

काठमाडौं । नेपाल प्रिमियर लिग (एनपीएल) अन्तर्गत आज दुई महत्वपूर्ण खेल हुँदैछन्। पहिलो खेल बिहान ११:४५ बजे पोखरा एभेन्जर्स र काठमाडौँ गोर्खाजबीच हुनेछ भने दोस्रो खेल दिउँसो ४ बजे सुदूरपश्चिम रोयल्स र चितवन राइनोजबीच हुनेछ।

जारी लिगमा पोखरा एभेन्जर्सले ५ खेलमा २ जित र ३ हारसहित ४ अंक जोड्दै पाँचौँ स्थानमा छ। काठमाडौँ गोर्खाजले भने ६ खेलमा ८ अंक बटुलेको छ र तालिकाको दोस्रो स्थानमा रहेको छ। काठमाडौँको आजको खेल लिग चरणको अन्तिम खेल हो।

कुशल भुर्तेल कप्तान रहेको पोखरामा सागर ढकाल, आकाश चन्द जस्ता राष्ट्रिय खेलाडी तथा डान डाउथवेट, जिम्मी निशाम, रेमन राइफर, एडम रोसिङ्टन र जेसन रोयजस्ता विदेशी खेलेका छन्।

काठमाडौँ गोर्खाजमा करण केसीको नेतृत्वमा भीम सार्की, शाहब अलाम, रशिद खान, मोहमद आदील आलम तथा विदेशी खेलाडी मार्वे गेरार्ड इरासमस, जोन एन्ड्रयु सिम्पसन र मिलिन्द कुमार मैदानमा उत्रनेछन्।

दोस्रो खेलमा अपराजित सुदूरपश्चिम रोयल्स र चितवन राइनोज भिड्ने छन्। सुदूरपश्चिमले ५ खेलमा १० अंकसहित शीर्ष स्थानमा रहँदै प्लेअफ सुरक्षित गरिसकेको छ। चितवनले भने ५ खेलमा ४ अंक जोड्दै छैटौँ स्थान ओगटेको छ।

दिपेन्द्रसिंह ऐरी कप्तान रहेको सुदूरपश्चिममा अभिनाश बोहरा, आरिफ शेख, विनोद भण्डारीलगायतका राष्ट्रिय खेलाडी तथा विदेशी तर्फ जोश ब्राउन, स्कट कुगेइलिन, क्रिस लिन र हर्मीत सिंह रहेका छन्।

चितवन राइनोजमा कुशल मल्लको कप्तानीमा रिजन ढकाल, कलमसिंह ऐरी, देव खनालजस्ता राष्ट्रिय खेलाडी तथा रवि भोपारा, सोहेल तनवीर, सैफ जैब, डेविड मलान र अल्पेस रामजानीजस्ता विदेशी खेलाडी सहभागी छन्।

आजका दुवै खेलले तालिका स्थितिमा महत्वपूर्ण प्रभाव पार्ने भएकाले समर्थकहरू उत्साहपूर्वक प्रतीक्षा गरिरहेका छन्।