परिचयपत्र हरायो ? यी सरकारी कागजातले पनि गर्न सकिन्छ मतदान

काठमाडौँ । निर्वाचन आयोगले मतदान प्रक्रियालाई सजिलो बनाउन परिचयपत्र सम्बन्धी व्यवस्था मिलाएको छ । आयोगका अनुसार मतदान गर्न जादाँ मतदाता परिचयपत्रलाई नै अनिवार्य आवश्यक रुपमा नलिई वैकल्पिक रुपमा अन्य सरकारी परिचयपत्रका आधारमा पनि मतदान गर्न सकिने व्यवस्था गरिएको छ ।

मतदानका दिन मतदाता परिचयपत्र नभएको अवस्थामा पनि नेपाली नागरिकताको प्रमाणपत्र,राष्ट्रिय परिचयपत्र,राहदानी,सवारी चालक अनुमतिपत्र वा जग्गाधनी प्रमाणपत्रमध्ये कुनै एक सक्कल कागजात देखाएर मतदान गर्न सकिने निर्वाचन आयोगले जनाएको छ ।

त्यस्तै गरी यस्ता कागजात लिएर मतदान गर्न जाने मतदाताको नाम भने अन्तिम मतदाता नामावलीमा समावेश हुनुपर्ने आयोगले स्पष्ट पारेको छ । नामावलीमा नाम रहेका मतदाताले सम्बन्धित मतदान केन्द्रमा गएर आफ्नो पहिचान खुल्ने सक्कल सरकारी कागजात देखाएपछि मतदान गर्न पाउनेछन् । यस व्यवस्थाले मतदातालाई मतदान प्रक्रियामा सहभागी हुन थप सहजता प्रदान गर्ने विश्वास आयोगले व्यक्त्त गरेको छ।