नेपाल टेलिकमको नयाँ प्रिपेड ई–सिम अब अनलाइनबाटै लिन सकिने

काठमाडौं । नेपाल टेलिकम ले नयाँ प्रिपेड ई–सिम अब अनलाइनमार्फत लिन सकिने सुविधा सुरु गरेको छ । यससँगै नयाँ ई–सिम लिन सेवाग्राही स्वयं टेलिकम कार्यालयमा उपस्थित हुनुपर्ने बाध्यता हटेको कम्पनीले जनाएको छ ।

सेवाग्राहीले नेपाल टेलिकम मा लगइन गरी ‘Get New Prepaid eSIM’  विकल्पमार्फत आवश्यक विवरण दर्ता गर्न सक्नेछन् ।

त्यसपछि विभिन्न वालेट तथा क्यूआर कोडमार्फत शुल्क भुक्तानी गरेपछि ई–सिमको क्यूआर कोड उपलब्ध हुनेछ । उक्त क्यूआर कोड मोबाइलको सेटिङमार्फत स्क्यान गरी ई–सिम सक्रिय गर्न सकिने कम्पनीले जनाएको छ ।

नेपाल टेलिकमका अनुसार यसअघि प्रयोगमा रहेको सिमलाई पनि अनलाइनमार्फत ई–सिममा रूपान्तरण गर्न सकिने सुविधा उपलब्ध छ । साथै नयाँ फिजिकल सिमका लागि फारम भर्ने तथा ग्राहक विवरण (केवाईसी) दर्ता वा अद्यावधिक गर्ने अनलाइन सुविधा पनि सोही पोर्टलमा राखिएको छ ।