एनपीएलका लागि कीर्तिपुर मैदान तयार, फ्लडलाइटसहित नयाँ स्वरुपमा

काठमार्डौँ । नेपाल प्रिमियर लिग (एनपीएल) को तेस्रो संस्करणलाई लक्षित गर्दै कीर्तिपुरस्थित त्रिभुवन विश्वविद्यालय अन्तराष्ट्रिय क्रिकेट मैदानको स्तरोन्नति तथा व्यवस्थापनको काम तीव्र पारेको छ ।

कात्तिक ९ देखि मंसिर ५ गतेसम्म सञ्चालन हुने एनपीएलका लागि मैदानलाई प्रतियोगिताअनुकूल बनाउन पूर्वाधारको काम अघि बढाइएको हो । मैदानसँगै प्रवेशद्धार,दर्शक व्यवस्थापन र अन्य आवश्यक संरचनाको काम अहिले अन्तिम चरणमा पुगेको छ ।

मैदान परिसरमा आवश्यक भौतिक सरचना निर्माणसँगैै पर्खाल निर्माणको कामसमेत भइरहेको छ । प्रतियोगिता सुरु हुनुअघि सबै तयारी पूरा गर्ने गरी काम अघि बढाइएको जनाइएको छ । एनपीएलपछि पनि त्रिवि क्रिकेट मैदान व्यस्त रहने भएको छ । एनपीएल सकिएलगतै यही मैदानमा एउटा अन्तराष्ट्रिय प्रतियोगिता आयोजना हुने बताइएको छ ।

मैदानमा फ्लडलाइटको व्यवस्था भइसकेकाले अब दिनमा मात्रै नभई रातिको समयमा समेत क्रिकेट प्रतियोगिता सञ्चालन गर्न सकिने भएको छ । यसले त्रिवि मैदानलाई आगामी घरेलु तथा अन्तराष्ट्रिय प्रतियोगिताका लागि थप उपयोगी बनाउने देखिएको छ ।